მიუნხენის „ბაიერნის“ მთავარმა მწვრთნელმა თომას ტუხელმა ჩემპიონთა ლიგის საპასუხო მერვედფინალში „ლაციოსთან“ მატჩის წინ ისაუბრა.

პირველი მატჩი მიუნხენელებმა სტუმრად 0:1 წააგეს, შესაბამისად, ახლა შეცდომის უფლება არ აქვთ. ტუხელის განცხადებით, ძნელი იქნება იტალიური გუნდისთვის ორი გოლის გატანა.

„რთული იქნება იტალიურ გუნდთან ქამბექი და მისთვის ორი გოლის გატანა, მითუმეტეს, სარის გუნდთან. ბუნდესლიგის მატჩები არანაირ გავლენას არ ახდენენ ჩემპიონთა ლიგის მატჩებზე.

ვეცდებით, უფრო აგრესიულად ვითამაშოთ, უფრო მეტი თავდაჯერებაა საჭირო. პირველი მატჩის მეორე ტაიმში ბევრი შეცდომა დავუშვით კონტრშეტევის ფაზაში. მათი ბოლო მატჩები ვნახეთ და გავაანალიზეთ. თამაში თამამად უნდა დავიწყოთ და 90 წუთის განმავლობაში პრესინგი ვითამაშოთ. რა თქმა უნდა, გვჭირდება ემოციური სტადიონიც, რომელიც გუნდს მუხტს გადასცემს, მაღალ დონეზე თამაში იქნება საჭირო.

ბოლო დროს ჩვენი შეცდომებით ბევრი გოლი გავუშვით, არ გამიკვირდება, თუ „ლაციო“ კონტრშეტევებზე ითამაშებს, ჩვენ კი დაგვჭირდება ბურთის ფლობა და დაცვაში ყურადღებით ყოფნა, როცა შეტევაში ვიქნებით.

არ მგონია, რომ ჩემთვის ეს თამაში ფინალი იყოს, სხვების ნაცვლად საუბარი კი არ შემიძლია. მხოლოდ იმის თქმა შემიძლია, რომ არავის აქვს ხვალინდელ თამაშში გამარჯვების ჩემზე მეტი ამბიცია. სიტუაცია ნათელია: ორბურთიანი სხვაობით უნდა მოვიგოთ, გამარჯვება გვჭირდება სარის გუნდის წინააღმდეგ, რომელიც კარგადაა ორგანიზებული“, - თქვა ტუხელმა.

შეგახსენებთ, რომ „ბაიერნისა“ და „ლაციოს“ მატჩი 5 მარტს გაიმართება.