რუმინეთის დედაქალაქ ბუქარესტში დასრულდა ევროპის ჩემპიონატი თავისუფალ ჭიდაობაში, რომლის ბოლო ფინალში გენო პეტრიაშვილმა იჭიდავა, მაგრამ დამარცხდა.

125 კგ წონით კატეგორიაში პეტრიაშვილმა საწყის წრეში ავსტრიელი იოჰანეს ლუდეშერი 9:0 დაამარცხა, შემდეგ ბულგარელ ალენ ხუბულოვს აჯობა 10:4, ხოლო ნახევარფინალში დენის ხრამიანკუ 10:0 გაანადგურა და ფინალში გავიდა, სადაც თურქ ტაჰა აკგულს შეხვდა, მაგრამ მარცხი განიცადა და ვერცხლს დასჯერდა.

პეტრიაშვილი ბრძოლის მიწურულს გააქტიურდა, როდესაც 0:5 მარცხდებოდა და 4 ქულა აიღო, მაგრამ მეტისთვის დრო არ ეყო და 4:5 დამარცხდა.

ამრიგად, საქართველოს თავისუფალი სტილით მოჭიდავეთა ნაკრებმა ევროპის ჩემპიონატი 1 ოქროს, 2 ვერცხლის და 3 ბრინჯაოს მედლით დაასრულა, რის შედეგადაც არაოფიციალურ გუნდურ ჩათვლაში მეორე ადგილი დაიკავა. მანამდე ბერძნულ-რომაულ ჭიდაობაში საქართველოს ნაკრებმა მხოლოდ 2 ბრინჯაოს მედალი მოიპოვა.