„ორლანდო მეჯიქის“ ქართველმა ცენტრმა, გოგა ბითაძემ NBA-ში მორიგი შედეგიანი შეხვედრა „კლივლენდ კავალიერსის“ წინააღმდეგ ჩაატარა.



ბითაძემ მოედანზე 16 წუთი გაატარა, რა დროშიც 10 ქულა, 6 მოხსნა, 1 შედეგიანი გადაცემა და 1 დაფარება დააგროვა. ქართველმა 9-დან 5 ბურთი ჩააგდო და აღსანიშნავია, რომ 6 მოხსნიდან 5 მას მეტოქის ფარზე ჰქონდა.

გარდა კარგი სტატისტიკური მაჩვენებლებისა, ბითაძემ ერთი ლამაზი ჩატენვაც შემოგვთავაზა და ჯარეტ ალენის წინააღმდეგ კარგი დაფარებაც შეასრულა, თუმცა მისი გარჯის მიუხედავად, „ორლანდო მეჯიქი“ მეტოქესთან 113:117 დამარცხდა.

ბრწყინვალე მატჩი ჰქონდა „კავალიერსის“ დონოვან მიჩელს, რომელმაც 43 ქულა ჩააგდო. ორლანდოს მხრიდან კარგი იყო მარკელ ფულცი 23 ქულით და პაოლო ბანკერო, რომელსაც 20 ქულასთან ერთად 10 მოხსნაც ჰქონდა.

დღევანდელი მარცხის შემდგომ, გოგა ბითაძეს და მის თანაგუნდელებს 34 მოგება და 45 მარცხი დაუგროვდათ და აღმოსავლეთ კონფერენციის მე-12 პოზიციას იკავებენ. მომდევნო შეხვედრას გუნდი კვლავ მე-4 პოზიციაზე მყოფი კლივლენდის წინააღმდეგ გამართავს.