მადრიდის „რეალის“ მთავარმა მწვრთნელმა კარლო ანჩელოტიმ ბრაზილიის ნაკრებში შესაძლო დანიშვნაზე კომენტარი გააკეთა. როგორც მან თქვა, ამ ეტაპზე სურს „რეალთან“ კონტრაქტს პატივი სცეს და მხოლოდ მადრიდულ კლუბში მუშაობაზე ფიქრობს.
„სასიამოვნოა, როდესაც ბრაზილიის ნაკრებს გიკავშირებენ, მაგრამ მე მინდა და უნდა ვცე კიდეც პატივი „რეალთან“ არსებულ კონტრაქტს. ყველას შეუძლია ის თქვას, რაც უნდა, მაგრამ რეალობა არის ის, რაც არის. კლუბთან კონტრაქტი მაქვს და მინდა მუშაობა გავაგრძელო. თუმცა, მომავალში რა მოხდება, არავინ იცის.
არ მიკვირს ჭორები და არც ვნერვიულობ. ერთადერთი, რაზეც ვფიქრობ, არის ამ კლუბის მოთხოვნების დაკმაყოფილება. მანამდე ვიმუშავებ აქ, სანამ კლუბი უფლებას მომცემს. ძალიან კარგად ვმუშაობთ და სიყვარულს ვგრძნობ. ჩემი გარემო მშვიდადაა და მეც მშვიდად ვარ. სეზონის ბოლომდე ორი თვე რჩება და ტიტულებისთვის ისევ ვიბრძვით“, - თქვა ანჩელოტიმ.
იტალიელმა სპეციალისტმა კომენტარი გააკეთა ჩავის განცხადებაზეც, რომელმაც თქვა, რომ გავი „ბარსელონას“ გარდა, სხვა კლუბში რომ თამაშობდეს, მას მედია სხვაგვარად მოეპყრობოდა. ანჩელოტის პრესკონფერენციაზე იგივე კითხვა დაუსვეს, მაგრამ ვინისიუსის შესახებ, რაზეც ასე უპასუხა:
„ბაბუაჩემს ბორბლები რომ ჰქონოდა, მანქანა იქნებოდა. სიტყვა თუს ან მაგრამის თქმით, წინ ვერ წახვალ. ყველას თავისი პრობლემა აქვს, ვინისიუსს თავისი ჰქონდა, გავის თავისი, მთავარია, რომ ფეხბურთელებს და ხალხს პატივი სცენ“.
