„პარი სენ-ჟერმენმა“ საფრანგეთის ლიგა 1-ის 25-ე ტურის მატჩში „დაუძინებელი მტერი“ „მარსელი“ სტუმრად 0:3 დაამარცხა.

შეხვედრის 25-ე წუთზე პარიზელთა თავდამსხმელმა, კილიან მბაპემ, ლიონელ მესის გადაცემის კვალად ანგარიში გახსნა. ოთხი წუთის შემდეგ მასპინძლების კარი თავად არგენტინელმა დალაშქრა, მბაპემ კი ასისტენტის როლი შეასრულა. მესისთვის ეს გოლი მე-700 გამოდგა საკლუბო დონეზე.

მეორე ტაიმში ვარსკვლავურმა წყვილმა ანგარიში კიდევ გაზარდა - ფრანგმა გოლი საკუთარ ანგარშზე ჩაიწერა, ისევ არგენტინელის ეფექტური პასის შემდეგ.

მბაპემ პარიზულ კლუბში 200 გოლის ნიშნულს უწია და ამ მაჩვენებლით პსჟ-ის ისტორიაში საუკეთესო ბომბარდირს - ედინსონ კავანის გაუტოლდა.

პარიზელებმა 60 ქულა მოაგროვეს და ლიგა 1-ის ცხრილს დამაჯერებლად ლიდერობენ. უშუალო მდევარ „მარსელს“ ისინი 8 ქულით უსწრებენ.

შეგახსენებთ, რომ 8 თებერვალს, „პარი სენ-ჟერმენმა“ და „მარსელმა“ საფრანგეთის თასის 1/8 ფინალში ითამაშეს. მაშინ გამარჯვება იგორ ტუდორის შეგირდებს დარჩათ (2:1).

საფრანგეთი

ლიგა 1

25-ე ტური. 26 თებერვალი

მარსელი - პსჟ 0:3

0:1 მბაპე (25), 0:2 მესი (29), 0:3 მბაპე (55)

მარსელი: ლოპესი, ვერეტუ, ბეიი (კლოსი 66), კოლაშინაცი, ტავარეში, რონჟიე, ბალერდი, გენდუზი, მალინოვსკი (უნაი 81), უნდერი (პაიეტი 81), ალექსის სანჩესი (ვიტინია 81)

მწვრთნელი: იგორ ტუდორი

პსჟ: დონარუმა, მუკიელე (ემერი 61), კიმპემბე (პერეირა 16), სერხიო რამოსი, მენდეში (ბერნატი 76), მარკინიოსი, ვერატი, რუისი, ვიტინია, მესი, მბაპე

მწვრთნელი: კრისტოფ გალტიე

მსაჯი: კლემან ტიურპენი

გაფრთხილება არ ყოფილა