დღეს დაკარის რბოლა დასრულდა, რომელიც ავტომობილების კლასში მეხუთედ მოიგო კატარელმა ნასერ ალ-ატიამ (ტოიოტა). მოტოციკლების კლასში კი KTM-ის არგენტინელმა კევინ ბენავიდესმა გაიმარჯვა, ვისთვისაც ეს დაკარზე მეორე ტრიუმფია.

ალ-ატიამ საბოლოოდ საათი და 20 წუთი მოუგო მეორეზე გასულ ფრანგ სებასტიან ლოებს (ბაჰრეინ რეიდ Xტრიმი). ის მესამე ეტაპიდან ჩაუდგა რბოლას სათავეში და ლიდერობა ბოლომდე შეინარჩუნა. ამგვარად, ის დაკარზე მეორე ყველაზე წარმატებული მრბოლია. მასზე მეტი მიღწევა მხოლოდ ფრანგ სტეფან პეტერანსელს (აუდი) აქვს, ვინც ამჯერად რბოლა ვერ დაასრულა. სხვათა შორის, პეტერანსელს დაკარის ექვსი ტიტული მოტოციკლების კლასში აქვს მოპოვებული.

„ყველასთვის ძალიან რთული რბოლა იყო. მაგრამ ჩვენ ისევ მოგება შევძელით. მიხარია, რომ ტიტულის დაცვა შევძელი. ბედნიერი ვარ, რომ მეხუთედ მოვიგე. გაგრძელებას და უფრო მეტის მოგებას ვაპირებ“, - განაცხადა ალ-ატიამ, ვინც რალი-რეიდებში მსოფლიოს მოქმედი ჩემპიონია.

ბოლო ეტაპი ფრანგმა გერლენ ჩიჩერიტმა მოიგო. ყველაზე მეტი, შვიდ ეტაპი კი ლოების გამრჯვებით დასრულდა. თუმცა ამის მიუხედავად, რბოლის დასაწყისში დაკარგული დროის გამო, საბოლოოდ ის მხოლოდ მეორე ადგილს დასჯერდა. ავტომობილების კლასში მესამე ადგილი ბრაზილიელმა ახალბეადმ, ლუკაშ მორაეშმა (ტოიოტა) დაიკავა.