ჩემპიონთა ლიგის მეხუთე ტურში „ნაპოლი“ „რეინჯერსს“ უმასპინძლებს და იტალიური მედია იტყობინება, რომ ლუჩანო სპალეტი შემადგენლობაში მნიშვნელოვან როტაციას გეგმავს.

როგორც ცნობილი ხდება, „რომასთან“ შეხვედრასთან შედარებით ნეაპოლელთა სასტარტო შემადგენლობაში 7 ცვლილება იქნება. ძირითადში ელოდებიან მარიო რუის, ელიფ ელმასის, ოლა ოსტიგორის, მატეო პოლიტანოს, ჯაკომო რასპდორის, ჯოვანი სიმეონესა და ჯანლუკა გაეტანოს გამოჩენას.

Area Napoli-ის ცნობით, დასვენება განსაკუთრებით სტანისლავ ლობოტკასა და ხვიჩა კვარაცხელიას სჭირდებათ, რომლებიც სავარაუდოდ თადარიგში იქნებიან. „ნაპოლის“ წინ „სასუოლოსთან“ თამაში აქვს (შაბათს), რის გამოც როტაცია მოსალოდნელია. მითუმეტეს, რომ „ნაპოლი“ ჩემპიონთა ლიგის ჯგუფიდან უკვე გასულია, თუმცა, ჯგუფში პირველი ადგილისთვის ისევ იბრძვის.

შეგახსენებთ, ხვიჩა კვარაცხელიამ მიმდინარე სეზონში 15-ვე შეხვედრაში მიიღო მონაწილეობა და ძირითადში მხოლოდ ერთხელ არ იყო - „ლეჩესთან“, როდესაც შეცვლაზე ითამაშა. სხვათა შორის, სეზონში „ნაპოლიმ“ მხოლოდ 2 თამაში ვერ მოიგო და ბოლოს სწორედ „ლეჩეს“ წინააღმდეგ (1:1).