ფეხბურთი

20:02 | 1.10.2022 | ნანახია [] - ჯერ

ლუჩანო სპალეტი: "კვარაცხელია სტრატოსფერული მოთამაშეა"

„ნაპოლის“ მთავარმა მწვრთნელმა ლუჩანო სპალეტიმ „ტორინოსთან“ მატჩის (3:1) შემდეგ ხვიჩა კვარაცხელიაზე ისაუბრა და თქვა, რომ ქართველი სტრატოსფერული მოთამაშეა.

პირველი ტაიმის მიმდინარეობისას, სპალეტიმ ხვიჩას რამდენჯერმე დაუძახა, მითითებები მისცა და სწორედ ამის შესახებ ილაპარაკა.

„კვარაცხელიას პირველ ტაიმში რამდენჯერმე იმიტომ დავუძახე, რომ ფორვარდთან უფრო ახლოს უნდა ეთამაშა, სანაცვლოდ ის ფლანგზე რჩებოდა და შეუძლებელი იყო ერთი-ერთზე მეტოქის დაცვის დაჯაბნა. მინდოდა უფრო შუაში ეთამაშა, მეორე ტაიმში მან ეს კარგად გააკეთა. კვარა საოცარი მოთამაშეა, რომელიც ახერხებს ბურთის გადამალვას, იცის მეტოქის მოტყუება და თავისუფალი თანაგუნდელის დანახვაც, როგორც ეს დღეს ორჯერ გააკეთა და ზელინსკის პასები მისცა. ორივე მხრიდან მოძრაობს, ორივე ფეხით ურტყამს, შეტევა ძალიან ბევრი ვარიაციით შეუძლია, რის გამოც სტრატოსფერული მოთამაშეა“, - თქვა სპალეტიმ.

შეგახსენებთ, რომ ხვიჩა კვარაცხელიას მიმდინარე სეზონში ყველა ტურნირზე 10 მატჩში 5 გოლი, 2 საგოლე პასი და 2 მოპოვებული პენალტი აქვს თავის აქტივში. „ნაპოლი“ სერია A-ს 20 ქულით ლიდერობს, მომდევნო მატჩს კი ჩემპიონთა ლიგაზე სტუმრად ამსტერდამის „აიაქსთან“ ჩაატარებს.

0.102485