ფორმულა ერთის ყოფილი შეფი ბერნი ეკლსტოუნი ბრაზილიაში მაშინ დააკავეს, როდესაც შვეიცარიაში გასამგზავრებლად, კერძო თვითმფრინავში ჯდებოდა. ადგილობრივი პოლიციის ინფორმაციით, დაკავების მიზეზი იარაღის უკანონო ტარებაა.

ბარგის რენტგენით შემოწმებამ გამოავლინა, რომ 91 წლის ეკლსტოუნს იარაღი ჰქონდა. ბრიტანელმა ბიზნესმენმა აღიარა, რომ იარაღი აქვს, მაგრამ არ ახსოვდა, რომ ის ჩანთაში ჰქონდა შენახული. მან გირაო გადაიხადა და შვეიცარიაში გამგზავრების უფლება მიიღო.

სან პაულუს პოლიციამ დაადასტურა, რომ ბიზნესმენი ცეცხლსასროლი იარაღის ტარებისთვის დააკავეს. მისი ვინაობა არ დაკონკრეტებულა. ოქმში ასევე წერია, რომ მოვერცხლისფრო იარაღი საბრძოლო მასალით დატენილი არ იყო. დაკავებულმა გირაოს სახით 6 060 რეალი (1 257 დოლარი) გადაიხადა. ამასთან, პოლიციამ დაკავებულს იარაღი ჩამოართვა.

ეკლსტოუნს ცოლად ჰყავს ბრაზილიელი ფაბიანა ეკლსტოუნი, ვინც FIA-ს ვიცე პრეზიდენტი და მსოფლიო მოტორ სპორტის საბჭოს წევრია.

ეკლსტოუნი ბრაზილიაში საქმეებზე იმყოფებოდა. ის ასევე ადგილობრივ რბოლას დაესწრო და ფორმულა 1-ის სამგზის ჩემპიონი, ნელსონ პიკე მოინახულა. ეკლსტოუნების ოჯახს სან პაულუს მახლობლად, ყავის პლანტაცია აქვს, რომელიც მათ 2012 წელს შეიძინეს.