პირველი სამი რბოლის შემდეგ, „მერსედესს“ კონსტრუქტორთა ჩემპიონატში მეორე ადგილი უკავია. თუმცა გერმანული გუნდის მანქანა მელბურნში სიჩქარით მეხუთე საუკეთესო იყო. „ფერარის“ და „რედ ბულს“ გარდა, მასზე სწრაფები „ალპინი“ და „მაკლარენიც“ იყვნენ. ამასთან, სამქიმიანები ლიდერებთან წრეზე წამზე მეტს აგებდნენ.
მთავარი პრობლემა, რომელიც გუნდს მანქანის პოტენციალის სრულად ათვისებაში უშლის ხელს, ხტუნვის ეფექტია, რომელიც სწორზე, მაღალი სიჩქარით მოძრაობისას ვლინდება. კიდევ ერთი ნაკლი ისაა, რომ მანქანა მძიმეა, რაც მის სიჩქარეზე უარყოფითად აისახება.
გუნდმა მელბურნში ორივე მანქანაზე ოპტიკური სენსორები დააყენა, რაც ინჟინრებს პრობლემის არსში ჩაწვდომაში უნდა დახმარებოდა. ეს კამერა/სენსორები, სიმძიმის მიუხედავად, რბოლის დროსაც არ მოუხსნიათ. ეს ნიშნავს, რომ „მერსედესისთვის“ რბოლა დამტებითი ინფორმაციის მიღების საშუალებაც იყო. იმავე მიზნით, ლუის ჰამილტონის და ჯორჯ რასელის მანქანები განსხვავებულად მომართეს.
„მანქანაზე ასზე მეტი ექსპერიმენტი ჩავატარეთ. ვცვლიდით სხვადასხვა პარამეტრებს, გზიდან დაშორებას, აეროდინამიკას და მის ელემენტებს. მაგრამ პრობლემის გადაჭრას ვერ ვახერხებთ“, - გამოცემა „ავტო მოტორ უნდ შპორტთან“ საუბრისას ამბობს „მერსედესის“ ინჟინერი, ვისი ვინაობაც დაფარულია.
მისივე თქმით, პრობლემა რთულია და გუნდი პირველ რიგში, სწორედ მისი გამომწვევი მიზეზების დასადგენად მუშაობს. მოხერხდა ხტუნვის ეფექტის შემცირება, თუმცა პრობლემა არ აღმოფხვრილა.
გუნდი ვერ აკონკრეტებს, თუ რა დრო დასჭირდება ხტუნვის ეფექტის აღმოფხვრას. ერთი რამ გარკვეულია - იმოლას რბოლისთვის დიდი ცვლილებები არ იგეგმება. ამის მიზეზი ისაა, რომ იმოლაში რბოლა სპრინტ კვალიფიკაციის ფორმტით ჩატარდბა, რაც მოკლე თავისუფალ პრაქტიკებს ითვალისწინებს. შესაბამისად, არ იქნება სიახლეების შემოწმების საშუალება. ამასთან, „მერსედესში“ ფიქრობენ, რომ იმოლას ასფალტის და შედარებით ნელი მოსახვევების გამო, ხტუნვის ეფექტი ნაკლებად შემაწუხებელ იქნება.
