ჩოგბურთი

3:59 | 27.11.2021 | ნანახია [] - ჯერ

ვილანდერი: ფედერერს დაბრუნებისას „რელობის გამოცდა“ ელის

დიდი სლემის შვიდი ტიტულის მფლობელი, შვედი მატს ვილანდერი ამბობს, რომ როჯერ ფედერერს ტურზე, ხანგრძლივი ტრავმული პაუზის შემდეგ დაბრუნებისას, „რელობის გამოცდის“ გავლა მოუწევს.

40 წლის ფედერერმა შვეიცარიულ მედიასთან საუბრისას განაცხადა, რომ დიდი ალბათობით, მომავალი სეზონის შუამდე დაბრუნებას ვერ შეძლებს. ამჟამად მისი მთავარი მიზანი, ფიზიკურ ფორმაში დაბრუნებაა. ის ამბობს, რომ მუხლზე სამი ოპერაციის შემდეგ, „ძალიან გაუკვირდება“, თუ უიმბლდონზე თამაშს შეძლებს.

შვეიცარიელი ჩოგბურთელი, ვისაც დიდი სლემის 20 ტიტული აქვს მოპოვებული, მსუბუქ ვარჯიშს და სირბილს იანვარში დაიწყებს, კორტზე ვარჯიშს კი მარტში ან აპრილში შეუდგება.

„ვფიქრობ, მისი დაბრუნება შესაძლებელია. მთავარია, საკუთარი თავი დაარწმუნოს, რომ ეს შეუძლია. მაგრამ ვფიქრობ, მისთვის დიდი პრობლემა ისაა, რომ ეს ბიჭები, სულ უფრო უკეთ თამაშობენ. ზვერევი და მედვედევი ის ჩოგბურთელები არიან, ვინც შესანიშნავ ჩოგბურთს თამაშობენ“, - ამბობს ვილანდერი და დასძენს:

„რა თქმა უნდა, ფედერერს აქტივში თავისი უბადლო მოწოდება აქვს. მაგრამ ზვერევთან და მედვედევთან შედარებით, რამდენად უკეთესი მოწოდება აქვს? ვფიქრობ, აქ მას რეალობის გამოცდა ელის“.

ფედერერმა 2020 წელს მუხლზე ორი ოპერაცია გაიკეთა, რის გამოც, თითქმის ერთი წელი გაუცდა. მარტში დაბრუნდა, მაგრამ ამ სეზონში მხოლოდ 13 შეხვედრის გამართვა შეძლო. უიმბლდონზე ისევ დაშავდა, რის გამოც, აშშ-ის ღია პირველობა გამოტოვა და მუხლზე კიდევ ერთი ოპერაცია გაიკეთა.

„ვფიქრობ, როჯერ ფედერერი ტურზე ბევრ შეხვედრას აღარ გამართავს. მან იცის, რომ მოგების შანსი ისევ აქვს. შესაძლოა, დიდ სლემზე ეს ვერ შეძლოს და იქნებ, ვერც ფინალს მიაღწიოს. მაგრამ სამ-ოთხ თამაშს მოიგებს. ვფიქრობ, მისთვის ეს დაბრუნებად ღირს“ - ამბობს ვილანდერი.

0.115189