სხვა

2:41 | 17.10.2021 | ნანახია [] - ჯერ

ბოლტი: დე გრასე დომინაციისთვის მზადაა

100 მეტრზე სპრინტში ოლიმპიური ჩემპიონი იტალიელი ლამონტ მარსელ ჯეკობსია, მაგრამ სახელოვანი იამაიკელი უსაინ ბოლტი დარწმუნებულია, რომ მალე მამაკაცთა სპრინტერულ დისტანციებზე, კანადელი ანდრე დე გრასე გაბატონდება.

ტოკიოში დე გრასემ ას მეტრზე ბრინჯაო მოიპოვა, 200 მეტრზე კი ოქროს მედალს დაეუფლა. ბოლტი დარწმუნებულია, რომ მომავალი წლის მსოფლიო ჩემპიონატზე, რომელსაც ამერიკის იუჯინი (შტატი ორეგონი) უმასპინძლებს, კანადელი სპრინტერი ორივე დისტანციაზე ფავორიტი იქნება.

26 წლის დე გრასეს ერთადერთი ოქრო ტოკიოს ოლიმპიადაზე აქვს მოპოვებული. თუმცა ჯამში ექვს ოლიმპიურ მედალს ფლობს და მსოფლიო ჩემპიონატებზე - ოთხს (არცერთია ოქროსი). მან ბოლტის ყურადღება რიოს (2016) თამაშებზე მიიქცია, როცა იამაიკელი ორას მეტრზე ოქროს დაეუფლა, კანადელს კი ვერცხლი „დაუტოვა“.

„ანდრე დე გრასე ყოველ გამოსვლაზე სტაბილურია და ყოველთვის ახერხებს კვარცხლბეკზე ასვლას. თუ ასე გაგრძელდა, მაშინ მას თვალი არ მოაშოროთ. ბევრ მორბენალს აქვს აღმავლობები და ჩავარდნები. იგებენ ერთ შეჯიბრს და აგებენ მეორეს. ის კი ყოველთვის კარგ ფორმაშია“, - ამბობს ბოლტი, ვინც რვაგზის ოლიმპიური ჩემპიონია.

სპორტიდან ბოლტის წასვლის შემდეგ (2017 წელი), სპრინტს მისი დარი ჩემპიონი, რა თქმა უნდა, არ ჰყავს. მას ჰკითხეს, ეგულება თუ არა ვინმე, ვინც მის ადგილს დაიკავებს, რაზეც იამაიკელი პასუხობს, რომ ჯერ არავინ ჩანს. ოღონდ არაა აუცილებელი, რომ ახალი ვარსკვლავი სპრინტერი იყოს.

„ვთვლი, რომ გამოწვევა ყველასთვის თანაბრადაა. არამხოლოდ სპრინტში. სულერთია, იქნება ის მორბენალი, ბირთვის მკვრელი, თუ სიგრძეზე მხტომელი. მთავარია, სპორტში ახალი პიროვნება მოვიდეს, ვინც სხვებისთვის ავტორიტეტი იქნება და სპორტს სახელს გაუთქვამს. ხალხი კი მისი გამოსვლებით ისიამოვნებს“, - ამბობს ბოლტი.

„შეერთებული შტატები ის ადგილია, სადაც მძლეოსნობა ნიშური სპორტია და პოპულარობით ვერ გამოირჩევა. მსოფლიოს მორიგი ჩემპიონატის იქ ჩატარება, პირველ რიგში, სწორედ პოპულარიზაციას გამოადგება. ეს კი ძალიან მნიშვნელოვანია“, - დასძენს იამაიკელი.

0.145434