ფეხბურთი

16:20 | 23.09.2021 | ნანახია [] - ჯერ

MARCA და AS: "მამარდაშვილი სეზონის სენსაცია იყო, მაგრამ ახლა სილესენის დრო მოვიდა"

„სევილიასთან“ მატჩის შემდეგ გიორგი მამარდაშვილის შესახებ ესპანური პრესა წერს და მის თამაშს განიხილავს. როგორც Marca და As-ი იტყობინებიან, ახლა მოვიდა დრო, რომ ხოსე ბორდალასმა ძირითადში იასპერ სილესენი დააბრუნოს, რომელსაც ივლისის შემდეგ არ უთამაშია.

„მამარდაშვილის შეცდომების კარს უღებს სილესენს. ახალგაზრდა ქართველის სერიოზული წარუმატებლობები მადრიდის „რეალისა“ და „სევილიას“ წინააღმდეგ ნიდერლანდელის დაბრუნებას ხელს უწყობს. ეს იყო სეზონის დასაწყისის ერთ-ერთი უდიდესი სენსაცია. ქართველმა მამარდაშვილმა, რომელიც მეორე გუნდისთვის გაიფორმეს, მრავალი ბარიერი დაძლია, რის გამოც სილესენი, ხაუმე და რივერო სათადარიგო სკამზე დარჩნენ და ის ბორდალასის მეკარე გახდა. ბრწყინავდა პირველ სამ თამაშში, მაგრამ მეოთხეში, პამპლონაში დაუშვა შეცდომა, რომელიც VAR-მა გამოასწორა. ალდერეტესთან კომუნიკაციის ნაკლებობა, რის შედეგადაც გოლი გავიდა. ვიდეორეფერიმ ხელახლა შეაფასა თამაში და თავდამსხმელი დაადანაშაულა. მამარდაშვილის ეჭვები გაიქარწყლა. შემდეგ იყო მისი შეცდომა მადრიდის „რეალთან“. კარიდან ცუდი გამოსვლა დასრულდა ბენზემას გოლით, რამაც „მესტალიაზე“ „ბლანკოსის“ ქამ-ბექი განაპირობა. ამის მიუხედავად ბორდალასმა ის ძირითადში დატოვა, რათა „სევილიასთან“ ეთამაშა და მოვიდა დასავიწყებელი საღამო.

სამივე გოლში მეტის გაკეთება შეეძლო, მაგრამ მეორე და მესამე გოლებში შეცდომა გროტესკული და ბავშვური იყო. მაღალი ბურთი თავზე გადაევლო, მერე კი კარი ნახევრად დატოვა და რაფა მირს მისცა გატანის შესაძლებლობა. ასეთი სიტუაციის წინაშეა და სილესენიც უკვე გამოჯანმრთელდა ფიზიკური პრობლემებისგან, რის გამოც სეზონის დასაწყისი გაუცდა. დადგა დრო ძირითადი მეკარის შეცვლისთვის. ახლა სილესენის ჯერია, რომ ხელთათმანები მოირგოს“, - წერს Marca.

„მამარდაშვილის შეცდომებმა სევილიაში განაახლა დებატები იმასთან დაკავშირებით, თუ ვინ უნდა იყოს ბილბაოსთან "ვალენსიას" კარში. „სევილიასთან“ თამაში სხვა საკითხებთან ერთად ტოვებს დებატს „ვალენსიას“ მეკარესთან დაკავშირებით. გააგრძელებს თამაშს მამარდაშვილი თუ სილესენი დაბრუნდება? ეჭვები, რომელიც არსებობდა პირველ ტურებში, ქართველის კარგი მუშაობით გაქრა, თუმცა შეცდომები ახალგაზრდა მეკარემ დაუშვა "ვალენსიას" მიერ გაშვებულ ბოლო ოთხ გოლში და ხელახლა ხსნის დებატებს "ბილბაოსთან" მატჩის წინ.

„დროა ვიფიქროთ „ატლეტიკთან“ თამაშზე. ძალიან მნიშვნელოვანი მატჩის შესანიშნავი გუნდის წინააღმდეგ. უნდა გავაანალიზოთ და გავაუმჯობესოთ სათამაშო ასპექტები. ფეხბურთელებმა პირველ რიგში იციან, რომ არსებობს შეცდომები, რომელთა დაშვება არ შეიძლება“, - თქვა ბორდალასმა „სევილიასთან“ მატჩის შემდეგ და მისი ბოლო წინადადება ღიად მიანიშნებს შეცდომებზე, მათ შორის, მეკარის შეცდომებზე.

კამერებმა თამაშის დროს დააფიქსირეს რამდენიმე საუბარი ბორდალასსა და მეკარეების მწვრთნელ ხოსე მანუელ ოჩოტორენას შორის. ბორდალასს 72 საათი აქვს გადაწყვეტილების მისაღებად მოვიდა თუ არა დრო მეკარის შეცვლის. ალიკანტელი სპეციალისტი ზაფხულში სილესენის გუნდში დარჩენის მომხრე იყო, მაგრამ შემდეგ არ ჰქონია საბაბი, რომ მამარდაშვილი შეეცვალა და ეს თვითონ ნიდერლანდელსაც აცნობა „ოსასუნასთან“ მატჩის შემდეგ, რომელშიც მან ფსონი კვლავ ქართველზე დადო. ბორდალასს სურდა დაეფასებინა ქართველის კარგი შრომა, რომელიც საწყის სამ ტურში აჩვენა და სხვებსაც აჩვენა, რომ ვინც შესაძლებლობას გამოიყენებს, ითამაშებს. თუმცა, ეს არ ნიშნავს, რომ ის უკმაყოფილო იყო ნიდერლანდელის ყოველდღიური მუშაობით.

ახლა, მამარდაშვილის დაშვებულმა შეცდომებმა სილესენის ძირითადში დაბრუნების შანსი გაზარდა, სეზონში პირველად. ნიდერლანდელი ტრავმირებული გახლდათ და ქართველი „ხეტაფესთან“ გამარჯვებაში მთავარი გმირი იყო. სილესენმა კი ბოლოს პრესეზონის პირველ მატჩში ითამაშა „ვილიარეალთან“, უკანასკნელი ოფიციალური თამაში კი 22 მაისს ჩაატარა. შემდეგ კორონავირუსი შეეყარა და დე ბურმა ევრო 2020-ზეც ამის გამო არ წაიყვანა“, - წერს As-ი.

შეგახსენებთ, გიორგი მამარდაშვილმა მიმდინარე სეზონში ექვს ტურში 7 გოლი გაუშვა, ორჯერ კარი მშრალად შეინახა და პირველ ტურში ტურის საუკეთესო მეკარედ დასახელდა. „ვალენსია“ უახლოეს მატჩს 25 სექტემბერს, „ბილბაოს“ წინააღმდეგ საკუთარ მოედანზე გამართავს.

0.113727