ფეხბურთი

23:28 | 3.06.2021 | ნანახია [] - ჯერ

ოფიციალურად: თორნიკე ოქრიაშვილი "აპოელის" ფეხბურთელია

თორნიკე ოქრიაშვილი კარიერას ნიქოზიის "აპოელში" გააგრძელებს. ტრანსფერი ოფიციალურად კვიპროსული გუნდის ვებგვერდმა დაადასტურა. ამრიგად, "აპოელში" ქვილითაიას შემდეგ ოქრიაშვილიც გადავიდა. მოგეხსენებათ, ცოტა ხნის წინ ნიქოზიელებმა გიორგი ქვილითაიასთან 3-წლიანი ხელშეკრულების გაფორმება დაადასტურეს.

"აპოელმა" ოქრიაშვილთანაც კონტრაქტი 2024 წლის ზაფხულამდე გააფორმა და 29 წლის ნახევარმცველი კვიპროსში რჩება, თუმცა, "ანორთოსისის" კონკურენტის რიგებში ითამაშებს. საინტერესოა, რომ კვიპროსული მედია აქტიურად წერდა, რომ ოქრიაშვილის ტრანსფერი "ომონიაში" იყო გადაწყვეტილი, მაგრამ როგორც ჩანს, სცდებოდნენ, რადგან ის "აპოელის" წევრი გახდა.

თორნიკე ოქრიაშვილი 2019 წლიდან „ანორთოსისის“ ღირსებას იცავდა და 41 მატჩში 13 გოლი გაიტანა. მანამდე მას „კრასნოდარში“, „ეშკიშეჰირსპორში“, „გენკში“, „ჩერნომორეცში“, „მარიუპოლში“, „შახტარსა“ და „გაგრაში“ უთამაშია.

„აპოელი“ კვიპროსის ყველაზე ტიტულოვანი გუნდია: 28-ჯერ გახდა ჩემპიონი, 21-ჯერ თასი და 14-ჯერ სუპერთასი მოიგო, თუმცა გასულ სეზონში მხოლოდ მერვე ადგილის დაკავება შეძლო. ნიქოზიელები ევროთასებზე წარმატებით თამაშობენ, სამჯერ ჩემპიონთა ლიგის ჯგუფურ ეტაპზეც ითამაშა (ბოლოს 2017-2018 წლების სეზონში), ხოლო 2011-2012 წლების სეზონში კი მეოთხედფინალში გასვლაც მოახერხა.

0.134724