კალათბურთი

1:31 | 28.01.2021 | ნანახია [] - ჯერ

თორნიკე შენგელიას MVP-ის ტიტული ევროლიგაში (+VIDEO)

ევროლიგაში მოსკოვის ცსკა-მ ორმატჩიანი წაგებების სერია დაასრულა და 22-ე ტურში ბერლინში, „ალბას“ მოუგო. თუმცა, რუსულ გუნდს გერმანიაში ძალიან გაუჭირდა და რომ არა ბოლო პერიოდში გამოფხიზლება, აუცილებლად დამარცხდებოდა.

საბოლოო, ცსკა-მ კლასის ხარჯზე მეტოქეს აჯობა და 71:68 მოუგო. ამ გამარჯვებაში ყველაზე დიდი წვლილი თორნიკე შენგელიამ შეიტანა, რომელიც გამარჯვებულთა შორის საუკეთესო იყო და მატჩის MVP გახდა.

თორნიკემ 26:09 წუთში 20 ქულა, 1 მოხსნა, 3 პასი, 2 ჩაჭრა და 1 დაფარება მიითვალა. ქართველმა მძიმე ფორვარდმა 7-დან 5 ორქულიანი, 3-დან 2 სამქულიანი და 6-დან 4 საჯარიმო ჩააგდო, მისი მარგი ქმედების კოეფიციენტი კი 21-ს გაუტოლდა. შენგელია ცსკა-ში როგორც მარგი ქმედების კოეფიციენტით, ისე მოპოვებული ქულებით საუკეთესო გახლდათ. მოსკოვურ გუნდში გამორჩეული ასევე ნიკოლა მილუტინოვი იყო, რომელმაც 10 ქულით და 11 მოხსნით ორმაგი დუბლი გაიფორმა.

ცსკა 16 გამარჯვებითა და 6 მარცხით სატურნირო ცხრილში მეორე ადგილზეა და „ბარსელონას“ ჩამორჩება, ხოლო მომდევნო ტურში 29 იანვარს, „ბაიერნს“ შინ დაუპირისპირდება.

0.157656