ჩოგბურთი

1:37 | 27.07.2020 | ნანახია [] - ჯერ

ენდი მარი აშშ-ის ღიაზე სათამაშოდ ემზადება

ბრიტანელი ჩოგბურთელი ენდი მარი ამბობს, რომ აშშ-ის ღია პირველობაზე სათამაშოდ ემზადება და სავარაუდოდ, დიდი სლემის ტურნირამდე, ცინცინატის მასტერსზეც ითამაშებს, რომელსაც ამჯერად ნიუ იორკის ფლეშინგ მედოუს კორტები უმასპინძლებს. ზუსტად ის კორტები, სადაც აშშ-ის ღია იმართება ხოლმე.

დიდი სლემის ტურნირების სამი ტიტულის მფლობელ მარის უკვე 10 თვეა, ტურნირებზე არ უთამაშია. ამის მიზეზი ტრავმაა, რომელიც კი მოირჩინა, მაგრამ შემდეგ პანდემიის გამო, სპორტი გაჩერდა. ამერიკაში გამგზავრებამდე, მარი ბრიტანელ ჩოგბურთელთა საჩვენებელ შეხვედრაში მიიღებს მონაწილეობას.

„ამ ყველაფერს ძალიან სკეპტიკურად ვუყურებდი, მაგრამ რაღაც ეტაპზე, ამაზე ფიქრი და ყველაფრის დაგეგმვა გიწევს. ასე დავგეგმეთ დღევანდელი ვარჯიში და შემდგომ კვირაში თამაშიც. უნდა ვეცადო, რომ აშშ-ის ღიასთვის, ფორმაში შესვლა შევძლო“, - ყვება მარი.

ATP-ს სეზონი 13 აგვისტოს უნდა განახლებულიყო, მაგრამ კორონავირუსის ეპიდემიის შემოტევის გამო, ვაშინგტონში დაგეგმილი ტურნირი (სიტის ღია) გაუქმდა. ამგვარად, აშშ-ის ღიამდე მხოლოდ ერთი ტურნირის - ცინცინატის მასტერსის გამართვა (20-28 აგვისტოს) ესწრება.

„სულაც არ მომწონს ის ფაქტი, რომ ზედიზედ ორ ტურნირზე გამოსვლა მიწევს. მაგრამ ისიც უნდა აღინიშნოს, რომ შექმნილ სიტუაციაში სხვა გზა არ არსებობს. ბევრს ხუთი-ექვსი კვირა უწევდა უქმობა, მე კი ათი თვეა, არ მითამაშია. ჩემი გუნდს წევრებს ვუთხარი, რომ მირჩევნია, საკვალიფიკაციო ეტაპი ცინცინატის ტურნირზე მქონდეს, სადაც ერთ ან ორ შეხვედრას ჩავატარებ. ვერ ვიხსენებ, რომ დიდი სლემის წინა კვირაში სადმე მეთამაშოს. ან ბოლოს ეს შეიძლება მაშინ გავაკეთე, როცა 19 წლის ვიყავი“, - დასძენს მარი.

0.123058