ფეხბურთი

20:57 | 22.07.2020 | ნანახია [] - ჯერ

კვარაცხელიამ "სპარტაკის" მცველები უსაქმოდ დატოვა და პენალტი მოიპოვა (+VIDEO)

რუსეთის პრემიერლიგის 2019-2020 წლების სეზონი დასრულდა. ყაზანის „რუბინი“, რომლის მიმართ ჩვენი ინტერესი საფუძვლიანი მიზეზი გამო განსაკუთრებულია მოსკოვის „სპარტაკს“ დაუხვდა.

ხვიჩა კვარაცხელიამ შეუცვლელად ითამაშა, ხოლო ზურიკო დავითაშვილი 64-ე წუთზე გამოჩნდა მოედანზე. ყაზანელებმა 1:2 წააგეს, ერთადერთი გოლი მათ რიგებში 45-ე წუთზე იგნატიევმა პენალტით გაიტანა, რომელიც კვარაცხელიამ მოიპოვა. საინტერესოა, რომ ამ თამაშში სამივე გოლი თერთმეტმეტრიანის ნიშნულიდან გავიდა. ხვიჩამ ისევ ტექნიკურად ითამაშა, რამდენიმე მცველს თავგზა აუბნია, საჯარიმოში კი წააქციეს.

„რუბინი“ 35 ქულით მეათე ადგილზე გავიდა და პრემიერლიგაში ადგილი შეინარჩუნა. კვარაცხელიამ სეზონი 27 თამაშში 3 გოლითა და 4 საგოლე პასით, ხოლო დავითაშვილმა 26 შეხვედრაში 2 გოლით დაასრულა. სხვათა შორის, „რუბინმა“ ლიგაში ყველაზე ცოტა, 18 გოლი გაიტანა. შედეგად, კვარაცხელია 3 გოლით გუნდის მეორე საუკეთესო ბომბარდირი გახდა (ევგენი მარკოვის შემდეგ 5 გოლი).

„უფამ“ სეზონი „არსენალთან“ უგოლო ფრით დაასრულა, ჯიმი ტაბიძემ შეუცვლელად ითამაშა ხოლო გია გრიგალავა განაცხადში არ ყოფილა. ორივე გუნდმა 38-38 ქულა დააგროვა და მერვე-მეცხრე ადგილები გაინაწილეს. ტაბიძეს კარგი სეზონი ჰქონდა და 25 მატჩში 1 გოლი გაიტანა.

მოსკოვის „ლოკომოტივი“ სტუმრად „ურალს“ გაეჯიბრა და 1:0 აჯობა. სოლომონ კვირკველიამ 90 წუთი ითამაშა, მისმა გუნდმა კი 57 ქულით მეორე ადგილი დაიკავა და ჩემპიონთა ლიგის ჯგუფურ ეტაპზე გავიდა. ქართველ მცველს არ ჰქონია კარგი სეზონის, მხოლოდ 9-ჯერ ითამაშა და აქედან ხუთჯერ იყო სასტარტო შემადგენლობაში.

0.112296