ქართული წარმოშობის უკრაინელმა ფეხბურთელმა ევგენი ბოხაშვილმა განაცხადა, რომ საქართველოში ფეხბურთი არ ვითარდება. 27 წლის თავდამსხმელს ქუთაისის „ტორპედოში“ გატარებული პერიოდიდან ყველაზე კარგად საკვები აგონდება.

როგორც ბოხაშვილმა Football.ua-სთან ინტერვიუში განაცხადა, საქართველოში ფეხბურთელისთვის კარგი პირობები მხოლოდ „დინამო თბილისშია“.

„ქუთაისში ფეხბურთელისთვის საუკეთესო პირობები არაა. ბელარუსში ფეხბურთი ვითარდება, ვარჯიშის კარგი პირობებია, მართალია ხელფასები დიდი არაა, თუმცა ფეხბურთის სათამაშოდ შესანიშნავია. საქართველო კი... ვწუხვარ, მე ხომ ქართველი ვარ, ეს ჩემი სამშობლოა, მაგრამ ფეხბურთისთვის საქართველო საუკეთესო ვარიანტი არაა. მეგობრული და ლამაზი ქვეყანაა, ძალიან გემრიელი საკვებით. ყველას პატივს ვცემ და მიყვარს, თუმცა იქ ფეხბურთი არ ვითარდება. თუ სათამაშოდ საქართველოში მიდიხარ, „დინამო თბილისში“ უნდა გადახვიდე, კარგი ბაზა აქვთ, მაგრამ სხვა გუნდები... „საბურთალო“ ჩემპიონი გახდა და ხან ერთ ადგილზე ვარჯიშობდა, ხან - მეორეზე“, - განაცხადა ბოხაშვილმა.

შეგახსენებთ, ევგენი ბოხაშვილი „ტორპედოს“ ღირსებას 2018 წელს იცავდა და 10 შეხვედრაში 1 გოლი გაიტანა.