ფორმულა 1-ის მთავარი აღმასრულებელი ჩიზ ქერი იმედს გამოთქვამს, რომ ფ1-ის 2020 წლის სეზონი ავსტრიის დიდი პრიზით, 3-5 ივლისს დაიწყება. უკვე დადასტურდა, რომ საფრანგეთის დიდი პრიზი, რომელიც ივნისში უნდა ჩატარებულიყო, აღარ გაიმართება. მაგრამ ქერი ამბობს, რომ სულ უფრო მეტად არის დარწმუნებული იმაში, რომ სეზონი ზაფხულში დაიწყება.

„ჩვენ სტარტის ივლისში აღებას ვუმიზნებთ. ივლისში, აგვისტოში და სექტემბერში ევროპულ რბოლებს გავმართავთ. პირველი რბოლა ავსტრიაში, 3-5 ივლისს გვექნება. სექტემბერში, ოქტომბერში და ნოემბერში, რბოლებს ევრაზიაში, აზიასა და ამერიკის კონტინენტებზე ჩავატარებთ. სეზონს კი დეკემბერში სპარსეთის ყურეში, ბაჰრეინის და აბუ დაბის რბოლებით დავასრულებთ“, - ამბობს ქერი და დასძენს, რომ შეცვლილი კალენდარი მალე გამოქვეყნდება.

ქერი ამბობს, რომ პირველი რბოლები ფანების გარეშე, ცარიელი ტრიბუნების წინ გაიმართება. თუმცა სეზონის მსვლელობისას, ფ1-ს მაყურებელიც თანდათან დაემატება. ქერი ამბობს, რომ ამ ეტაპზე მიმდინარეობს მოლაპარაკებები იმ ქვეყნებთან, სადაც რბოლების ჩატარება იგეგმება. მოლაპარაკების მთავარი თემა, გუნდების მიღების და შექმნილ სიტუაციაში ოპერირების საკითხებია.

ყველა საკითხის შეთანხმებისას, პრიორიტეტი მონაწილეთა ჯანმრთელობის დაცვა იქნება. და სეზონი მხოლოდ იმ შემთხვევაში დაიწყება, თუ ორგანიზატორები დარწმუნდებიან, რომ საფრთხე არავის დაემუქრება. პრობლემების მოსაგვარებლად, ფორმულა 1-ს პარტნიორობას FIA, გუნდები, რბოლების პრომოუტერები და ფინანსური მხარდამჭერები უწევენ, რისთვისაც ქერი ყველას მადლობას უხდის.