ფეხბურთი

11:05 | 1.04.2020 | ნანახია [] - ჯერ

მერებაშვილი: "პანიკის საფუძველი არაა, მაგრამ სიფრთხილე საჭიროა"

პლოცკის „ვისლას“ ფეხბურთელმა გიორგი მერებაშვილმა კლუბის ვებგვერდთან ისაუბრა. მთავარი თემა რა თქმა უნდა, კორონავირუსის გამო შეცვლილი ცხოვრების რეჟიმი იყო.

მერებაშვილმა აღნიშნა, რომ დრო წიგნების კითხვაში გაჰყვას, ინდივიდუალურად ვარჯიშობს და გარეთ თითქმის არ გადის. ქართველი შემტევი ხალხს მოუწოდებს, რომ სახლში დარჩნენ, რადგან ეს პანდემიის დასამარცხებლად ამ ეტაპზე ერთადერთი გზაა.

„ძალიან დამწუხრებული ვარ შექმნილი მდგომარეობის გამო. მსოფლიოში ყველასთვის რთული პერიოდია. პირადად მე ვცდილობ სახლში ვიყო და გარეთ მხოლოდ აუცილებლობის შემთხვევაში გავდივარ. ყველა საჭირო პროდუქტი შევიძინე.

თავისუფალი დრო ბევრი მაქვს. საღამოს ტელევიზორის ყურება მიყვარს, ვცდილობ დრო წიგნების კითხვაში გავიყვანი. გარდა ამისა, ცხადია, ინდივიდუალურად სისტემატურად ვვარჯიშობ. ამ პანდემიის ერთადერთი პლიუსი ისაა, რომ შეგვიძლია მეტი დრო გავატაროთ ოჯახთან და საყვარელ ადამიანებთან, რასაც იშვიათად ვახერხებთ. სამზარეულოს პროფესიონალი არ ვარ, მაგრამ ვცდილობ საჭმელი მოვამზადო, ასე უფრო ნატურალურია და რესტორანში სიარულზე უმჯობესია. თანაც, აღმოვაჩინე, რომ ეს პროცესი სიამოვნებას მანიჭებს.

ყველა ფეხბურთელს ინდივიდუალური სავარჯიშო გეგმა აქვს. ვცდილობ კუნთები არ მოვადუნო და უფრო გავაძლიერო. რა თქმა უნდა, რთულია ფეხბურთელისთვის თამაშის გარეშე ყოფნა, მაგრამ ვცდილობ ფიზიკური ფორმა შევინარჩუნო და ვიმედოვნებ, რომ მალე ყველაფერი დასტაბილურდება.

სიმბოლურ ნაკრებში მოხვედრა? ჩემთვის ძალიან სასიამოვნო და გასახარია. ყველაფერს გავაკეთებ „ვისლასთვის“ და ამ ქალაქისთვის, ამ კლუბის ფერები ყოველთვის ჩემს გულში დარჩება. მინდა მადლობა გადავუხადო გულშემატკივრებს, რადგან ისინი მოტივაციას გვმატებენ და იმედია მალე სტადიონზე შევხვდებით.

მინდა მოვუწოდო ყველა ადამიანს, რომ დარჩნენ სახლში, რომ ამ მძიმე პერიოდს გავუძლოთ. პანიკის საფუძველი არ არსებობს, მაგრამ სიფრთხილე საჭიროა, რომ არ დავუშვათ ამ ვირუსის უფრო მეტად გავრცელება და მასზე გავიმარჯვოთ. დავრჩეთ სახლში და ყველაფერი უფრო სწრაფად გამოსწორდება“, - უთხრა გიორგიმ პოლონური გუნდის ვებგვერდს.

0.154529