გიორგი შერმადინის „იბეროსტარ ტენერიფე“ კოპა დელ რეის (ესპანეთის თასი), სადაც ლიგა ენდესას სატურნირო ცხრილში საუკეთესო რვა პოზიციაზე გუნდი კვალიფიცირდა, პირველივე ეტაპზე გამოეთიშა.

„ტენერიფემ“ გიორგის ყოფილ გუნდ „მორაბანკ ანდორას“ უმასპინძლა და მძიმე ბრძოლაში ორი ქულის სხვაობით 85:87 დამარცხდა.

ანდორელებმა თავიდან სამივე პერიოდი მოიგეს და დასკვნითი მეოთხედის წინ 8-ქულიანი უპირატესობა მოიპოვეს. მიუხედავად იმისა, რომ შერმადინმა და მისმა თანაგუნდელებმა ბოლო ათწუთეულში ჩამორჩენა მინიმუმამდე შეამცირეს, მარცხს ვერ გადაურჩნენ.

ქართველმა ცენტრმა 22:25 წუთში 19 ქულა, 4 მოხსნა და 1 პასი მიითვალა. გიორგიმ 11-დან 7 ორქულიანი (64%) და 6-დან 5 საჯარიმო (83%) ჩააგდო, შედეგად მისი მარგი ქმედების კოეფიციენტი 20-ს გაუტოლდა. ამ მაჩვენებლითა და მოპოვებული ქულებით ჩვენებური თანაგუნდელთა შორის მხოლოდ მარსელინო უერტასს ჩამორჩა, რომელმაც 20 ქულა მიითვალა და 28 მარგი ქმედების კოეფიციენტი დააფიქსირა.

აქვე შეგახსენებთ, რომ „იბეროსტარ ტენერიფე“ ლიგა ენდესაში მეოთხე პოზიციაზე იმყოფება და დანარჩენებთან შედარებით ერთი თამაშით ნაკლები აქვს ჩატარებული.