ესპანური „ბასკონიასთვის“ მიმდინარე სეზონი ერთობ უფერულად მიმდინარეობს და გუნდს ვერც ახალი მწვრთნელი დუშკო ივანოვიჩი შველის, რომლის ხელმძღვანელობით ვიტორიელებმა ზედიზედ მეორედ განიცადეს გამანადგურებელი მარცხი.

ამჯერად, ესპანეთის ლიგა ენდესას მე-15 ტურში სტუმრად „სარაგოსასთან“ – 80:101. ჩვენთვის ყველაზე მნიშვნელოვანი ისაა, რომ ივანოვიჩის ხელმძღვანელობით თორნიკე შენგელიაც ვეღარ ირჯება ძველებურად.

ქართველმა სამი დღის წინ ევროლიგაში კინკილა ქულით დაასრულა თამაში, ახლა კი 31:33 წუთში 12 ქულა, 7 მოხსნა და 1 პასი მიითვალა. თორნიკემ 9-დან 6 ორქულიანი ჩააგდო, ხოლო 3 სამქულიანი ააცილა. შედეგად მისი მარგი ქმედების კოეფიციენტი 12-ს გაუტოლდა. მეტ ჯენინგი კი ვიტორიელებს 8 ქულით შეეწია.

„ბასკონიას“ 7 გამარჯვების წილ 8 მარცხი აქვს და მე-12 ადგილზეა, ხოლო მომდევნო ტურში 5 იანვარს, „მანრესას“ უმასპინძლებს.