ოთარ კიტეიშვილი საქართველოს 2019 წლის საუკეთესო ფეხბურთელის ნომინაციაში საუკეთესო სამეულში იყო წარდგენილი, თუმცა საბოლოოდ, ჯაბა კანკავას ჩამორჩა. გრაცის „შტურმის“ ნახევარმცველმა 2019 წელი შეაჯამა და დამდეგი წლის მთავარ მიზანზე ისაუბრა.

„პირველ რიგში მინდა მივულოცო საქართველოს შობა-ახალი წელი, ვუსურვებ ბევრ წარმატებას და ბედნიერებას. რაც შეეხება 2019 წელს, იყო გარკვეული კარგი მომენტები, მაგრამ თვითკრიტიკულად თუ შევხედავთ, მაინც არ იყო ის წელი, რომელიც ქართულ ფეხბურთს კარგად შეესაბამება. თუმცა 17 და 19-წლამდე ნაკრებებს წარმატებული წელი ჰქონდათ, იგივე 21-წლამდე ნაკრებსაც კარგი თამაშები ჰქონდა.

ვთვლი, რომ 2020 წელს ამის უფრო დაბალანსება და განვითარება უნდა მოხდეს. მარტში გველოდება უმნიშვნელოვანესი თამაშები მარტში, რომელიც არის ქართველი ხალხის ოცნება და იმედი, ეს იმედი და ოცნება რეალობაში აუცილებლად უნდა გარდავსახოთ. ყველაფერს გავაკეთებთ ამისთვის და პირობას ვდებთ, როგორც ფეხბურთელები, ისე სამწვრთნელო შტაბი“, - განაცხადა კიტეიშვილმა.