ფეხბურთი

17:05 | 27.10.2019 | ნანახია [] - ჯერ

ფრე "დინამო ბათუმის" სასარგებლოდ

საქართველოს კრისტალბეთ ეროვნული ლიგის 32-ე ტურის მთავარი შეხვედრა თბილისში, „მიხეილ მესხზე“, „საბურთალოსა“ და „დინამოს“ შორის გაიმართა. შეიძლება ითქვას, რომ ეს თამაში საჩემპიონო რბოლაში ბევრ რამეს არკვევდა, მაგრამ დაფიქსირებული შედეგით ყველაზე მეტად „დინამო ბათუმმა“ იხეირა.

აჭარლებმა ორი დღის წინ „ვიტ ჯორჯიასთან“ დაკარგეს ქულა და ეს ორივე თბილისური გუნდისთვის იდეალური შანსი იყო. „საბურთალო“ გამარჯვების შემთხვევაში ბათუმელებთან ჩამორჩენას კინკილა ქულამდე შეამცირებდა, ხოლო „დინამო“ თუ მოიგებდა, საერთოდ გალიდერდებოდა.

ბუნებრივია, სწორედ ამიტომ მატჩი მეტად საინტერესო და დაძაბული გამოდგა, მაგრამ გოლი არ გასულა. უნდა ითქვას, რომ „საბურთალო“ გაცილებით გააზრებულ ფეხბურთს თამაშობდა და უამრავი საგოლე მომენტიც შექმნა მეტოქის კართან.

თუმცა, უშედეგოდ, ხან არაზუსტად ურტყამდნენ მასპინძლები, უმეტესად კი, დინამოელთა კარის დარაჯი ხოსე პერალესი უბრალოდ შეუდარებლად ირჯებოდა და უდაოდ მატჩის საუკეთესო ფეხბურთელი გახლდათ.

ფრე 0:0, რომელმაც სატურნირო ცხრილში ყველაფერი უცვლელი დატოვა. „დინამო ბათუმი“ 64 ქულით ლიდერია, „დინამო თბილისს“ 63 ქულა აქვს, „საბურთალოს“ – 61. წინ კიდევ ოთხი ტურია და გარკვეული არაფერია. სამივე გუნდი აგრძელებს ჩემპიონობისთვის ბრძოლას და ახლა თითოეულ ქულას ნამდვილად ოქროს ფასი ადევს.

„საბურთალო“ – „დინამო თბილისი“ 0:0 (0:0)

0.135079