ჭიდაობა

22:30 | 26.06.2019 | ნანახია [] - ჯერ

ვერცხლ-ბრინჯაო და ოქრო-ბრინჯაოს შანსი

მინსკში მიმდინარე მეორე ევროპულ თამაშებზე თავისუფალი სტილით ჭიდაობაში მედლების ოთხი კომპლექტი გათამაშდა და საქართველოს ნაკრების ანგარიშზე ორი მედალია. გივი მაჭარაშვილმა (125 კგ) ვერცხლი მოიპოვა. ავთანდილ კენჭაძემ (74 კგ) - ბრინჯაო.

ქართველმა მძიმეწონოსანმა ფინალის გზაზე სამი შეხვედრა ჩაატარა. პირველ წრეში ფინელ იერე ჰეინოს 10:0 მოუგო. მეოთხედფინალში რუმინელი რარეს ჩინტოანი დაჩაგრა - 14:3. ნახევარფინალში კი აზერბაიჯანელ ჯამალადინ მაგომედოვს აჯობა - 4:2. საჩემპიონო ბრძოლაში გივი მაჭარაშვილმა რუსეთის ნაკრების წევრ ანზორ ხიზრიევთან წააგო (2:8) და მეორე საპრიზო ადგილს დასჯერდა.

ავთანდილ კენჭაძე რეპეშაჟის ფინალში ბელარუს აზამატ ნურიკაუს დაეჭიდა და 8:5 დაამარცხა.

დღესვე, საპრიზო სამეულები 57 და 86 კილოგრამ წონით კატეგორიებშიც შეივსო, ოღონდ ქართველების - ლაშა ლომთაძისა და სანდრო ამინაშვილის გარეშე.

ხვალ მედლები თავისუფალ ჭიდაობაში, დარჩენილ ორ წონაში გათამაშდება - 65 და 97 კილოგრამებში და საქართველოს ნაკრები ერთი ოქროს მედლისთვის იბრძოლებს. უმაღლეს ტიტულს ვლადიმერ ხინჩეგაშვილი (65 კგ) შეუტევს.

ოლიმპიური, მსოფლიოს და ევროპის სამგზის ჩემპიონი ნახევარფინალში უხერხულ მეტოქეს და უმთავრეს ფავორიტს - რუსეთის ნაკრების წევრ ახმედ ჩაკაევს დაუპირისპირდა და ბევრისთვის მოულოდნელად, იოლად აჯობა - 8:2.

საქართველოს ნაკრების ყველაზე ტიტულოვანი წევრი მორიგი ოქროსთვის ხვალ აზერბაიჯანელ ჰაჯი ალიევს დაუპირისპირდება.

ხვალვე, 97 კილოგრამ წონით კატეგორიაში მოჭიდავე ელიზბარ ოდიკაძეც გააგრძელებს ჭიდაობას საპრიზო სამეულში მოსახვედრად. რეპეშაჟის ნახევარფინალში პოლონელ რადოსლავ ბარანს შეხვდება და თუ მოუგებს, ბრინჯაოს ფინალში უკრაინის სახელით მოჭდავე მურაზ მჭედლიძის პირისპირ დადგება.

სარეკლამო ადგილი - 23
250 x 500
0.12651