ფეხბურთი

1:33 | 17.06.2019 | ნანახია [] - ჯერ

ყატარის ისტორიული ფრე კოპა ამერიკაზე (+VIDEO)

დიდი ხანია პარაგვაის ფეხბურთის ოქროს ხანა წარსულს ჩაბარდა, მაგრამ ყატარის ნაკრებთან მაინც ცალსახა ფავორიტად სახელდებოდა. B ჯგუფის პირველი ტურის მეორე მატჩი „მარაკანაზე“ (უნდა ითქვას, რომ თითქმის ცარიელ „მარაკანაზე“) პარაგვაისა და ყატარის მატჩი შედგა.

რიოს ლეგენდარულ სტადიონს ისეთი მატჩებისთვის უმასპინძლია, რა გასაკვირია, რომ ხსენებულმა თამაშმა დიდი ინტერესი ვერ გამოიწვია, მაგრამ საინტერესო დაპირისპირება ნამდვილად გამოდგა. ყატარისთვსი კოპა ამერიკაზე ეს პირველი შეხვედრა იყო და ისტორიაც დაწერა. არადა, პარაგვაელთათვის ყველაფერი კარგად მიდიოდა. ედუარდო ბერიცოს გუნდი სწრაფადვე ვეტერანმა ოსკარ კარდოზომ პენალტით დააწინაურა, ხოლო მეორე ტაიმის დასაწყისში დერლის გონსალესის შორეულმა გასროლამ მიზანს მიაღწია და თითქოს ყველაფერი დასრულდა. ორბურთიანი უპირატესობა და თამაშის სურათი სხვანაირად ფიქრის შესაძლებლობას არავის აძლევდა...

თუმცა, ყატარის ნაკრები თამაშს არ გამოეთიშა და მალევე შეძლო ერთი ბურთის გაქვითვა. აზიის თასზე ალმოეზ ალი გამორჩეული იყო და კოპა ამერიკაზეც გახსნა პირადი ანგარიში, თანაც ბრწყინვალე, მოხდენილი გოლით. 77-ე წუთზე კი, პარაგვაელთა დაცვის ხაზი ჩავარდა და ბუალემ ხუხიმ გათანაბრება მოახერხა. დარჩენილ დროში არაფერი შეცვლილა და ყატარმა კოპა ამერიკაზე ისტორიული, პირველი ქულა მოიპოვა. პარაგვაის ნაკრებმა კი მდგომარეობა ერთობ დაიმძიმა, რადგან ჯგუფის დარჩენილი ორი მატჩი არგენტინასთან და კოლუმბიასთან ელოდება.

მეორე ტურის შეხვედრები 20 ივნისს შედგება, კოლუმბია ყატარს, არგენტინა კი პარაგვაის დაუპირისპირდება.

პარაგვაი - ყატარი 2:2 (1:0)

გოლები: 1:0 კარდოზო (4, პენ), 2:0 გონსალესი (56), 2:1 ალმოეზ ალი (68), 2:2 ხუხი (77)

0.121833