ჭადრაკი

22:40 | 1.06.2019 | ნანახია [] - ჯერ

ძაგნიძე გალიდერდა

რუსეთის ქალაქ ყაზანში მიმდინარე პრეტენდენტთა ტურნირს 2 ტურის თავზე 2 ლიდერი ჰყავს და სასიხარულოა, რომ ერთ-ერთი მათგანი საქართველოს ქალთა ნაკრების წევრი ნანა ძაგნიძეა (2510).

დღეს, ქართველმა მოჭადრაკემ შავი ფიგურებით უკრაინელი ანა მუზიჩუკი (2539) დაამარცხა და 1.5 ქულა მოაგროვა. ასეთივე მაჩვენებელი აქვს რუს ალეკსანდრა გორიაჩკინასაც (2522), რომელმაც თეთრებით თანამემამულე ვალენტინა გუნინას (2506) სძლია.
მე-2 ტურის დარჩენილი 2 პარტია ყაიმით დასრულდა: ეკატერინა ლაჰნო (2554) – ალექსანდრა კოსტენიუკი (2546), ტან ჩჟუნი (ჩინეთი, 2513) – მარია მუზიჩუკი (უკრაინა, 2563).
მე-3 ტურში, რომელიც 2 ივნისს ჩატარდება, ასეთი წყვილები გვაქვს: გუნინა – კოსტენიუკი, გორიაჩკინა – ლაჰნო, ჩჟუნი – ა.მუზიჩუკი, ძაგნიძე – მარია მუზიჩუკი.
შეგახსენებთ, რომ პლანეტის 8 უძლიერესი ქალი ერთმანეთს ორ წრედ ეჯიბრება, ხოლო გამარჯვებული მსოფლიოს მოქმედ ჩემპიონ ცზიუ ვენცზიუნთან (ჩინეთი) მატჩში თამაშის უფლებას მოიპოვებს.
ასპარეზობის საპრიზო ფონდი 200 000 ევროს შეადგენს, სათამაშო დღეები კი ასეე გაწერილი: 31 მაისი-2 ივნისი; 4-6, 8-10, 12-14, და 16-17 ივნისი; ტაი-ბრეიკი 18 ივნისს გაიმართება; თამაშის დასაწყისი ადგილობრივი დროით – 15:00 საათი.

Loading...
0.133938