ურუგვაის ეროვნული ნაკრების და კატალონიის "ბარსელონას" თავდამსხმელმა ლუის სუარესმა განაცხადა, რომ კოპა ამერიკისთვის მზად იქნება. "ბლაუგრანას" ოფიციალური ვებგვერდის ინფორმაციით, ფეხბურთელმა მენისკის ოპერაცია გაიკეთა და 4-6 კვირის განმავლობაში მოედანზე გასვლას ვერ შეძლებს.

"ყველაფერი კარგად იქნება. ერთ თვეში სათამაშოდ მზად ვიქნები." - განუცხადა სუარესმა El Pais-ს.

კოპა ამერიკა ბრაზილიაში 14 ივნისს აიღებს სტარტს და ურუგვაი პირველ შეხვედრას 16 ივნისს ეკვადორის წინააღმდეგ ჩაატარებს. სუარესმა მიმდინარე სეზონში 49 მატჩი ჩაატარა, გაიტანა 25 გოლი და 13 საგოლე გადაცემა შეასრულა.