საქართველოს კრისტალბეთ ეროვნული ლიგის მე-11 ტურის მეორე სათამაშო დღე გორში, გორის „დილასა“ და საჩხერის „ჩიხურას“ მატჩით დაიწყო.

„დილამ“ მიმდინარე სეზონი წარუმატებლად დაიწყო, მაგრამ ამ თამაშს ორმატჩიანი მოგებათა სერიით შეხვდა, ხოლო „ჩიხურა“ საერთოდ, პირველი ტურის შემდეგ (ზედიზედ 9 თამაში) დაუმარცხებლად მოვიდა აქამდე.

ამჯერად, უფრო ძლიერი გიორგი დეკანოსიძის გუნდი გახდა, რომელმაც იმერული მოწინააღმდეგე ადვილად, პირველივე ტაიმში გატანილი გოლებით დაამარცხა. ნონიკაშვილმა და გოშთელიანმა 24-ე წუთისთვის გორელებს სერიოზული უპირატესობა მოუტანეს და დარჩენილ დროში სოსო ფრუიძის გუნდმა სიტუაციის შეცვლა ვერ მოახერხა.

ამრიგად, „დილამ“ მიჯრით მესამე გამარჯვება მოიპოვა, 14 ქულა დააგროვა და მეექვსე ადგილამდე აღზევდა, ხოლო „ჩიხურამ“ 9-მატჩიანი წაუგებელი სერია დაასრულა, 15 ქულა აქვს და მეხუთე პოზიციას იკავებს.

„დილა“ – „ჩიხურა“ 2:0 (2:0)

გოლები: 1:0 ნონიკაშვილი (12), 2:0 გოშთელიანი (24)