კალათბურთი

1:26 | 7.04.2019 | ნანახია [] - ჯერ

ბექა ბურჯანაძის 7-დან 5 სამქულიანი და ბრწყინვალე მატჩი ესპანეთში (+VIDEO)

ესპანეთის საკალათბურთო ჩემპიონატის 26-ე ტურში ბექა ბურჯანაძის „გიპუზკოამ“ „ესტუდიანტესი“ დრამატულ ბრძოლაში, 93:92 დაამარცხა. მასპინძლები მთელი თამაში განმავლობაში აგებდნენ. მეტიც, პირველი ტაიმის შემდეგ ჩამორჩენა 22 ქულაც იყო. თითქოს, თამაშის გადარჩენის შანსი არ არსებობდა, მაგრამ „გიპუზკოამ“ მეორე ტაიმი დიდებულად ჩაატარა.

მესამე პერიოდი ბურჯანაძემ და მისმა თანაგუნდელებმა 15, ხოლო დასკვნითი პერიოდი 12 ქულით მოიგეს და საბოლოოდ გამარჯვებაც იზეიმეს.

ბრწყინვალე ქამ-ბექში უდიდესი როლი დაიდო ქართველმა კალათბურთელმა, რომელიც ბოლო დროს შესაშურ ფორმაშია. ბექა ორივე გუნდის რიგებში ქულების მიხედვით საუკეთესო იყო.

ბურჯანაძემ პარკეტზე 34:28 წუთი გაატარა და ხსენებულ დროში 26 ქულა, 6 მოხსნა და 1 პასი მიითვალა. ჩვენებურმა 7-დან 4 ორქულიანი, 4-დან 3 საჯარიმო და 7-დან 5(!) სამქულიანი ჩააგდო.

ბექას მარგი ქმედების კოეფიციენტი 27-ს გაუტოლდა და ამ მაჩვენებლით მხოლოდ თანაგუნდელ ვიაჩესლავ ბობროვს ჩამორჩა (29).

„გიპუზკოას“ 26 თამაშში 7 მოგების წილ 19 წაგება აქვს და ისევ ბოლო, მე-18 საფეხურზე იმყოფება. მომდევნო მატჩს კი 13 აპრილს, სტუმრად „მანრესასთან“ გამართავს.

0.128929