მადრიდის „რეალისა“ და მარსელოს 12-წლიანი ურთიერთობა დასასრულს მიუახლოვდა. ბრაზილიელმა განაპირა მცველმა ტურინის „იუვენტუსთან“ პირადი კონტრაქტი უკვე შეათანხმა და თითქმის გადაწყვეტილია, რომ ზაფხულში იტალიაში გადაინაცვლებს.

As-ის ინფორმაციით, მარსელო „ბებერ ქალბატონთან“ 4-წლიან კონტრაქტს გააფორმებს და სეზონში მისი ანაზღაურება 12 მილიონ ევროს გაუტოლდება.

ახლა ჯერი კლუბებს შორის შეთანხმებაზეა და შემდეგ ტრანსფერის ოფიციალურად დადასტურებას წინ არაფერი დაუდგება. ამრიგად, 30 წლის ბრაზილიელი უახლოეს მეგობარ კრიშტიანუ რონალდუსთან ერთად უკვე „იუვენტუსის“ მაისურით ითამაშებს.

შეგახსენებთ, მარსელო „რეალში“ 2007 წლიდან თამაშობს. თუმცა, მიმდინარე სეზონში ძირითად შემადგენლობაში იშვიათად ხვდება და ცნობილია, რომ გუნდის დატოვება უნდა.