არაბეთის გაერთიანებულ საამიროებში მიმდინარე აზიის თასის გათამაშება დასკვნით ფაზაში შევიდა. უკვე გაირკვა პირველი ფინალისტი - იაპონიის ნაკრები.

ამომავალი მზის ქვეყნის შვილებმა ნახევარფინალში ირანის ნაკრებს პრობლემების გარეშე, 3:0 აჯობეს. უგოლო პირველი ტაიმის შემდეგ იაპონიამ მეტოქე აშკარად დაჯაბნა. დუბლი გაიფორმა იუია ოსაკომ, ხოლო გენკი ჰარაგუჩიმ შეხვედრას წერტილი დაუსვა.

იაპონიის ნაკრების მეტოქე დღეს, მეორე ნახევარფინალურ წყვილში გაირკვევა. მასპინძელი არაბეთის გაერთიანებული საამიროები, რომელსაც სხვათა შორის, იაპონიის ნაკრების ყოფილი თავკაცი, იტალიელი ალბეტო ძაკერონი წვრთნის, ყატარს დაუპირისპირდება.

აქვე გეტყვით, რომ იაპონიის ნაკრებს აზიის თასის მეხუთედ მოგების შანსი აქვს, ხოლო ფინალური მატჩი კი, 1 თებერვალსაა ჩანიშნული.

ირანი - იაპონია 0:3 (0:0)

ირანი: ბეირანვანდი, ჰადსაფი, პურალიგანჯი, კანანი, რეზაეიანი, მოჰამადი, დეჟაგა (გოდოსი 71), ებრაჰიმი, ამირი (ანსარიფარდი 58), აზმუნი, ჯაჰანბაჰში (ტორაბი 71)

იაპონია: გონდა, იოშიდა, ნაგატომო, საკაი (მუროია 73), ენდო (სიოტანი 60), ტომიასი, ჰარაგუჩი, შიბასაკი, დოანი (იტო 89), ოსაკო, მინამინო

გოლები: 0:1 ოსაკო (56), 0:2 ოსაკო (67, პენ), 0:3 ჰარაგუჩი (90)