ფეხბურთი

19:10 | 18.01.2019 | ნანახია [] - ჯერ

ოფიციალურად: გიორგი ლორია გერმანიის II ბუნდესლიგაში ითამაშებს (+VIDEO)

საქართველოს ნაკრების მეკარე გიორგი ლორია გერმანიის II ბუნდესლიგაში ითამაშებს. 32 წლის ქართველმა კიპერმა კონტრაქტი „მაგდებურგთან“ გააფორმა. აღნიშნული ინფორმაცია გერმანული გუნდის ვებგვერდმა ოფიციალურად დაადასტურა.

ლორია ახალ გუნდს თავისუფალი აგენტის სტატუსით შეუერთდა და კონტრაქტი 2019 წლის 30 ივნისამდე გააფორმა. ქართველი კიპერი „მაგდებურგის“ კარს 1-ნომრიანი მაისურით დაიცავს.

ლორიას აქამდე „დინამოს“, ბერძნული „ოფისა“ და „ოლიმპიაკოსის“, რუსული „კრილია სოვეტოვისა“ და "ანჟის" ღირსება დაუცავს, ხოლო საქართველოს ნაკრებში 2008 წლიდან დღემდე 48 მატჩი აქვს ჩატარებული. გასული წლის სექტემბრიდან მოყოლებული ჩვენებური უგუნდოდ იყო და ყაზახური მედიის ცნობით, „ტობოლში“ მისი გადასვლა გადაწყვეტილიც გახლდათ. თუმცა, სასიამოვნოა, რომ ასე არ მოხდა და ჩვენებურმა კარიერის გერმანიაში გაგრძელება არჩია.

რაც შეეხება „მაგდებურგს“ – II ბუნდესლიგაში 18 ტურის შემდეგ 11 ქულით ბოლოსწინა, მე-17 ადგილზეა. თუმცა, გადარჩენის შანსი რა თქმა უნდა, აქვს, რადგან სამშვიდობო, მე-15 პოზიციას ოდენ ორი ქულა აშორებს. გიორგის დებიუტი შესაძლოა ხვალ, „კოტბუსთან“ ამხანაგურ მატჩში შედგეს. მეორე ბუნდესლიგა კი 29 იანვარს განახლდება და „მაგდებურგი“ „აუეს“ უმასპინძლებს.

სტატისტიკა
0.478916