ჭადრაკი

0:51 | 31.12.2018 | ნანახია [] - ჯერ

ქართველთა წარუმატებელი ბლიცი

რუსეთის ქალაქ სანკტ-პეტერბურგში დასრულებულ მსოფლიოს ჩემპიონატზე ელვისებურ ჭადრაკში (ბლიცი) თავის გამოჩენა ვერ მოახერხეს ქართველმა მოჭადრაკეებმა.
ქალთა ტურნირში პირველ ნომრად საქართველოს ნაკრების ლიდერი ნანა ძაგნიძე (2580) იყო განთესილი, თუმცა, მან 17 ტურში მხოლოდ 9.5 ქულა მოაგროვა და 35-ე ადგილზე გავიდა.
ქართველთაგან საუკეთესო შედეგი მერი არაბიძემ (2323) აჩვენა, რომელიც 10.5 ქულით მე-17 იყო, ბელა ხოტენაშვილმა (2355) და ლელა ჯავახიშვილმა (2357) კი 10-10 ქულით, შესაბამისად, 26-ე და 32-ე შედეგები დააფიქსირეს.
დანარჩენ ჩვენებურთა მდგომარეობა ასეთია: 40. ნინო ბაციაშვილი (2320) – 9.5 ქულა; 51. ქეთი წაწალაშვილი (2211) – 9.0; 108. მარიამ თევზაძე (2082) – 6.5; 109. ნინო ხომერიკი (2299) – 6.5;
ქალებში ჩემპიონობა რუსმა კატერინა ლაჰნომ (2560) იზეიმა, რომელმაც თავი 13.5 ქულას მოუყარა და ირანელ სარასადატ ხადემალშარიეჰს (2377) ნახევარი ქულით აჯობა, მე-3 კი ჩინელი ტინჯიე ლეი (2458) იყო 12.5 ქულით.
კაცთა ტურნირში პირველობა არავის დაუთმო პლანეტის უძლიერესმა მოჭადრაკე მაგნუს კარლსენმა (ნორვეგია, 2939), რომელმაც 21 ტურში 17.0 ქულა მოაგროვა და პოლონელ იან-კშიშტოფ დუდას (2694) ნახევარი ქულით გაუსწრო, ბრინჯაოს მედალი კი ამერიკელ ჰიკარუ ნაკამურას (2889) ერგო – 14.5 ქულა.
საქართველოს ნაკრების წევრთაგან საუკეთესო შედეგი ივან ჩეპარინოვმა (2618) აჩვენა, რომელმაც 12.0 ქულით მე-40 ადგილი დაიკავა. ასეთივე მონაგარის მქონე მიხეილ მჭედლიშვილი (2607) კი 57-ე იყო.
დანარჩენმა ქართველმა მოჭადრაკეებმა ასეთი შედეგები დააფიქსირეს: 59. ბაადურ ჯობავა (2705) – 11.5; 124. ლევან ფანცულაია (2584) – 10.0; 128. თორნიკე სანიკიძე (2484) – 10.0;

0.11124