ძიუდო

15:25 | 16.12.2018 | ნანახია [] - ჯერ

ლიპარტელიანის და თუშიშვილის ოქროს მასტერსი

ძიუდოში 2018 წლის სეზონის დასკვნითი ტურნირი – მსოფლიოს მასტერსი საქართველოს ჰიმნით დაგვირგვინდა. უმძიმეს წონით კატეგორიაში - +100 კილოგრამში კვარცხლბეკის უმაღლეს საფეხურზე ავიდა მსოფლიოს მოქმედი ჩემპიონი გურამ თუშიშვილი და თავის წონაში მსოფლიოს რეიტინგის ლიდერის პოზიცია კიდევ უფრო გაიმყარა. ოქროს მედლითვე და ასევე მსოფლიოს რეიტინგის ლიდერის რანგში დახურა სეზონი საქართველოს ნაკრების კაპიტანმა ვარლამ ლიპარტელიანმაც (100 კგ). სულ კი საქართველოს ნაკრების შვიდკაციანი განაცხადის ხუთი წევრი ავიდა მასტერსის კვარცხლბეკზე. ამირან პაპინაშვილი (60 კგ) ვერცხლს დაეუფლა, ვაჟა მარგველაშვილი (66 კგ) და ლაშა შავდათუაშვილი (73 კგ) – ბრინჯაოებს. უმედლოდ მხოლოდ ლუხუმ ჩხვიმიანი (60 კგ) და ბექა ღვინიაშვილი (90 კგ) დარჩნენ.

ვარლამ ლიპარტელიანმა ფინალის გზაზე რუსეთის ნაკრების წევრი ნიაზ ბილალოვი, ირლანდიელი ბენჯამინ ფლეჩერი და ებრაელი პეტერ პალჩიკი ჩამოიშორა. გადამწყვეტ ბრძოლაში კი ოტგონბაატარ ლხაგვასურენს უნდა დასჭიდებოდა, მაგრამ მონღოლი მეტოქე არ გამოუცხადდა.

გურამ თუშიშვილმა ფინალამდე ყირგიზი იური კრაკოვეცკი, ავსტრიელი შტეფან ჰეგი და იაპონელი კოკორო კაგუერა ისე დაამარცხა, საჭიდაოდ განკუთვნილი დროის სრულად გამოყენება არც ერთთან არ დასჭირდა. საჩემპიონო ბრძოლაში კი ბრაზილიელი რაფაელ სილვა წუთსა და 15 წამში შებოჭა.

ლიპარტელიანი და თუშიშვილი მსოფლიოს მასტერსის ჩემპიონები ზედიზედ მეორედ გახდნენ.

ბექა ღვინიაშვილი გუანჯოუს ტატამზე ერთადერთხელ გავიდა – საქმეში მეორე წრიდან ჩაერთო და უხერხულ მეტოქესთან - ჰოლანდიელ ნოელ ვან ტენდთან დამარცხდა. ამ ჰოლანდიელს ღვინიაშვილი კარიერაში მეოთხედ დაეჭიდა და მეოთხედვე წააგო.

90 კილოგრამ წონით კატეგორიაში ოქროს მედალს ესპანეთის ნაკრების წევრი ნიკოლოზ შერაზადიშვილი ავიდა.

Loading...
0.123414