ფერნანდო ალონსო მომავალი სეზონის ინდი 500-ის რბოლაში, „მაკლარენთან“ ერთად, „შევროლეს“ 2.2-ლიტრიანი წყვილ ტურბოიანი V6 ძრავით აღჭურვილი ავტომობილით იასპარეზებს.

ესპანელ მრბოლს, ფორმულა 1-ის მსოფლიო ჩემპიონის ორი ტიტულის (2005 და 2006 წლები, რენოსთან ერთად) გარდა, ფ1-ის 32 რბოლა აქვს მოგებული და კვარცხლბეკზე ადგილი 97-ჯერ დაიკავა. გარდა ამისა, გასულ სეზონში ლე მანის 24-საათიან რბოლაშიც გაიმარჯვა (ტოიოტასთან ერთად). ინდი 500-ზე გამარჯვების შემთხვევაში, ის სამმაგი გვირგვინის მფლობელი გახდება.

„ჩემთვის დიდი პატივია ბოუტი ბრენდთან ერთად ასპარეზობა. მისი ძრავი საუკეთესო ვარიანტია იმისათვის, რომ წინა რიგებში რბოლა შევძლო. „შევის“ შესაძლებლობებს ახლახანს გავეცანი, როცა ჯიმი ჯონსონის ნასქარ-ის ავტომობილით გავედი ტრასაზე. მე ეს მომეწონა! ინდი 500-ზე გამოსვლა ყველასთვის დიდი პატივია და მე ვამაყობ იმით, რომ ჩვენს გუნდთან ერთად, „შევროლეც“ იქნება“, - განაცხადა ალონსომ.

ესპანელი მრბოლი „შევროლეს“ ძრავით პირველად იასპარეზებს, თუმცა „მაკლარენისთვის“ ამერიკული ბრენდი კარგად ნაცნობია. 1966 წელს ორმა კომპანიამ ერთობლივი ძალისხმევა სერია კან-ამ-ზე მიმართა და მომდევნო 7 წელიწადში, რბოლების 70 პროცენტზე მეტი მოიგო. მათ შორის, 1968-1970 წლების სეზონებში, „მაკლარენ-შევროლემ“ ზედიზედ 23 რბოლის მოგება მოახერხა!

„შევროლე“ ინდიქარ-ის სერიას შვიდი წლის წინათ დაუბრუნდა და მას შემდეგ, მისი ძრავებით, სხვადასხვა პილოტებს 118-დან 73 რბოლა აქვთ მოგებული. გარდა ამისა, ამერიკულმა მწარმოებელმა ინდიქარ-ის კონსტრუქტორთა ექვსი თასი აიღო. ხუთჯერ კი მისი ძრავით მოასპარეზე პილოტები ჩემპიონები გახდნენ.