იმ დროს, როდესაც საქართველოს საკალათბურთო ნაკრები მსოფლიო ჩემპიონატის საკვალიფიკაციო ციკლის მატჩში ესტონეთს ეპაექრებოდა, თორნიკე შენგელიასა და მეტ ჯენინგის “ბასკონია” სტამბულს ესტუმრა და ევროლიგის მორიგი შეხვედრა “ანადოლუ ეფესთან” 85:96 წააგო.

შეგახსენებთ, რომ ფიბა-სა და ევროლიგას შორის არსებული უთანხმოების გამო, ეროვნულ ნაკრებებს თამაში შესუსტებული შემადგენლობებით უწევთ, საქართველოს ეროვნულ გუნდისთვის კი, ეს, შენგელიას და ჯენინგის არყოფნაში გამოისახება.
გასულ მატჩში შენგელია სასტარტო ხუთეულში გამოჩნდა, თუმცა, 5 პერსონალური ფოლი მიიღო და მოედანზე მხოლოდ 19:00 წუთი გაატარა. თოკომ 2 სამქულიანი ჩააგდო, 2 ორქულიანი კი ააცილა და 6 ქულა, 2 მოხსნა და 1 პასი მოაგროვა.
ქართველმა მძიმე ფორვარდმა ბურთი 3-ჯერ დაკარგა, ერთხელ დაუფარეს, მის წინააღმდეგ კი, თამაშის წესები 4-ჯერ დაირღვა.
გაცილებით შედეგიანი იყო ჯენინგი, რომელმაც 32:11 წუთში 20 ქულა, 1 მოხსნა, 4 პასი და 3 ჩაჭრა მიითვალა. მეტმა 2-დან 1 ორქულიანი, 9-დან 5 სამქულიანი და 3-ვე საჯარიმო გამოიყენა, ბურთი 4-ჯერ დაკარგა, 2 პერსონალური ფოლი მიიღო, მის წინააღმდეგ კი ერთხელ დაჯარიმდნენ.
სტუმართა რიგებში საუკეთესო სარგებლიანობის კოეფიციენტი (18) სწორედ ჯენინგს ჰქონდა, “ანადოლუ ეფესს” კი 16-16 ქულით ბროკ მოტუმმა და ვასილე მიჩიჩმა ულიდერეს.
“ბასკონიას” ათ ტურში უკვე 7 მარცხი მოუგროვდა და 16-გუნდიან ლიგაში მისთვის უჩვეულო მე-12 ადგილზე იმყოფება, მომდევნო შეხვედრას კი 7 დეკემბერს, შინ ლიდერ მოსკოვის ცსკა-სთან ჩაატარებს.