ძიუდო

14:50 | 25.11.2018 | ნანახია [] - ჯერ

უშანგი მარგიანს გრან სლემის მედლამდე ერთი მოგება დააკლდა

საქართველოს ძიუდოისტთა ნაკრებმა ოსაკას გრან სლემზე გამოსვლა მედლის გარეშე დაასრულა. დღეს მამაკაცებში საპრიზო სამეულები ბოლო სამ წონით კატეგორიაში შეივსო. საქართველოს სახელით კი კონკურენციაში უშანგი მარგიანი (90 კგ), ვარლამ ლიპარტელიანი (100 კგ) და გურამ თუშიშვილი (+100 კგ) ჩაებნენ.

ლიპარტელიანი და თუშიშვილი ტურნირზე პირველ ნომრებად იყვნენ განთესილები. ორივემ მეორე წრიდან დაიწყო, მაგრამ საწყის ეტაპზევე დამარცხდნენ. ვარლამ ლიპარტელიანმა ყაზახი ადილხან კოზიბაიევის იპონით ძლევის შემდეგ ბრაზილიელ რაფაელ ბუზაკარინისთან "ოქროს დროში” წააგო და გრან სლემს მერვედფინალიდან გამოეთიშა. გურამ თუშიშვილმა კი შეჯიბრება ჰოლანდიელ ჰენკ ხროლთან დაჭიდებით დაიწყო და დაასრულა. ხროლმა ვაზარით იმარჯვა.

უშანგი მარგიანს კვარცხლბეკამდე ერთი ნაბიჯი დააკლდა. მსოფლიოს შარშანდელმა პრიზიორმა მერვედფინალში მასპინძელთა ჯილას – რიო დე ჟანეიროს ოლიმპიური თამაშების ჩემპიონ მაშუ ბეიკერს მოუგო იპონით. იქამდე ავსტრალიელ სებასტიან ტემესის აკმარა წუთი და 40 წამი. მეოთხედფინალში კი მეექვსე წუთის მიწურულსღა გატეხა ჩეხი დევიდ კლამერის წინააღმდეგობა.

ამის შემდეგ, უშანგი მარგიანს კიდევ ორ იაპონელთან მოუწია დაპირისპირება და ორივესთან "ოქროს დროში” დამარცხდა – ნახევარფინალში სოიჩირო მუკაისთან, ხოლო რეპეშაჟის ფინალში – სანშირო მურაოსთან.

საქართველოს ნაკრები ოსაკას გრან სლემზე ხუთი ძიუდოისტით გამოვიდა. მარგიანის, ლიპარტელიანისა და თუშიშვილის გარდა, კონკურენციაში ჩაებნენ ვაჟა მარგველაშვილი (66 კგ) და ნუგზარ ტატალაშვილი (81 კგ). ლუხუმ ჩხვიმიანმა (60 კგ), ლაშა შავდათუაშვილმა (73 კგ) და ზებედა რეხვიაშვილმა (81 კგ) კი ჭიდაობა ტრავმების გამო ვერ შეძლეს.

0.145495