სხვა

13:07 | 16.09.2018 | ნანახია [] - ჯერ

ტოჩინოშინის მარცხი ნაკაბიზე

ქართველმა სუმოისტმა ლევან გორგაძემ იგივე ტოჩინოშინმა ტოკიოს “რიოგოკუ კოკუგიკანში” მიმდინარე სექტემბრის სუპერტურნირზე 5 მოგების წილ მე-3 მარცხი განიცადა.


აკი ბაშოს შუალედურ მე-8 დღეს (ნაკაბი) დასავლეთის ოძეკის წოდების მქონე ტოჩინოშინი აღმოსავლეთის ოძეკი გოეიდოს გაეჯიბრა და იორიკირით წააგო.
გოეიდოს 7 გამარჯვება მოუგროვდა, თუმცა, ლიდერთა ჯგუფში მაინც არ იმყოფება, რადგანაც იოკოძუნები – კაკურიუ და ჰაკუჰო მაქსიმალური შედეგს ინარჩუნებენ.
ვთქვათ ისიც, რომ დღეს პირველად წაიფორხილეს ოძეკი ტაკაიასუმა და აღმოსავლეთის მე-9 მაეგაშირა ჰოკუტოფუჯიმ, ხოლო იოკოძუნა კისენოსატო უკვე მეორედ დამარცხდა.
ხვალ, საშემოდგომო სუპერტურნირზე მე-9 დღის ორთაბრძოლები შედგება და ტოჩინოშინის პირისპირ სწორედ ხსენებული კისენოსატო დადგება.
ამით, ქართველი გოლიათი დიდ ჩემპიონებთან შერკინებების სერიას გახსნის და იმის კვალობაზე, რომ კადობანში გახლავთ ჩაყენებული (თუკი დადებითი ბალანსი არ დააფიქსირა, ოძეკობას დაემშვიდობება), მაქსიმალური მობილიზება მართებს. ტოჩინოშინი რიგით 72-ე იოკოძუნასთან ურთიერთშეხვედრებში 9:16-ს აგებს.
რანგით მე-2 დივიზიონ ჯურიოში ზედიზედ მე-3 გამარჯვება იზეიმა გაგამარუს შიკონათი ცნობილმა თეიმურაზ ჯუღელმა, რისი წყალობითაც ჩვენებური თანაბარ ბალანსზე (4 მოგება, 4 მარცხი) გავიდა.
აღმოსავლეთის მე-12 ნომრის წოდების მქონე ქართველმა სუმოისტმა დღეს აღმოსავლეთის მე-7 რეიტინგოსან ჩიიონოოს ოშიდაშით აჯობა, ხვალ კი, ძალებს აღმოსავლეთისვე მე-10 ნომერ ტობიძარუსთან მოსინჯავს, რომელთანაც ერთხელ უკვე დამარცხებულა.

0.124882