ფეხბურთი

22:05 | 9.09.2018 | ნანახია [] - ჯერ

ცუდი ხარისხი, დიდებული - შედეგი

საქართველოს ეროვნულმა ნაკრებმა ინერვიულა და გვანერვიულა. თუმცა, ასეც კარგია, რადგან ფეხბურთს უხდება ნერვიულობა და ამ ყველაფრის ფონზე საქართველოს ნაკრებმა ერთა ლიგის მეორე ტურში ისევ მოიგო. მოიგო გვიანი გოლით, მაგრამ დამსახურებულად.

შორს ვართ იმ აზრისგან, რომ თამაშის ხარისხი კარგი იყო, უბრალოდ აქ ერთი მნიშვნელოვანი ფაქტორიც გასათვალისწინებელია. ლატვიის ნაკრებმა ყრუ დაცვა ითამაშა და თამამად შეიძლება ითქვას სათამაშო დორის უმეტესი ნაწილი 11 კაცით დაცვაში იდგა. რა თქმა უნდა, ეპიზოდურად ლატვიელები შეტევაში გადადიოდნენ, მაგრამ ეს მხოლოდ ეპიზოდურად. ვლადიმირ ვაისმა მატჩისწინა პრესკონფერენციაზე აღნიშნა, რომ ლატვიელთა კარგი დაცვისთვის გასაღები იყო მოსარგები. გასაღების მორგება კი ძალიან გაჭირდა, ძალიან.

პირველი ტაიმი ისე მიილია, საგოლე მომენტები არ ყოფილა. ვერ ვიტყვით, რომ მეორე ნახევარი იყო ამ მხრივ გამორჩეული, მაგრამ მთავარი ტაბლოა. საქართველოს ნაკრებს შეეძლო გატანა, ოდენ შორეული დარტყმებით, ორჯერ თორნიკე ოქრიაშვილს ჰქონდა შანსი, ერთხელ – ჯაბა კანკავას. მერე კი, საქმეში გიორგი ჩაკვეტაძე ჩაერთო. 19 წლის შემტევმა თერთმეტმეტრიანი მოიპოვა!

უმაღლესის საფეხბურთო სასჯელი თორნიკე ოქრიაშვილმა გოლად აქცია და ეს გამარჯვებას ნიშნავდა. მიუხედავად იმისა, რომ ბოლო წუთებზე ბალტიისპირელებს ჰქონდათ გოლის გატანის შესაძლებლობა, თამაში საქართველოს გამარჯვებით დასრულდა.

ვლადიმირ ვაისის გუნდმა ერთა ლიგა არცთუ კარგი სათამაშო ხარისხით, მაგრამ დიდებული შედეგით დაიწყო. 6 ქულა ორ შეხვედრაში, ეს მაქსიმუმია. “ჯვაროსნები” ჯგუფს ერთპიროვნულად ლიდერობენ და მოდით, პირდაპირ ვთქვათ, ჯგუფიდან გასასვლელად ძალიან დიდი ნაბიჯი გადადგა.

საქართველოს ნაკრები მომდევნო შეხვედრას 13 ოქტომბერს, ანდორის ნაკრებთან ჩაატარებს.

საქართველო – ლატვია 1:0 (0:0)

თბილისი, “დინამო არენა”

მაყურებელი: 50 000

საქართველო (4-2-3-1): ლორია; კაკაბაძე, კვირკველია, კაშია, ნავალოვსკი; კანკავა, კვეკვესკირი; ოქრიაშვილი (გვილია 79), ყაზაიშვილი (ხოჭოლავა 90), ჩაკვეტაძე (პაპუნაშვილი 86); კაჭარავა

მწვრთნელი: ვლადიმირ ვაისი

ლატვია (4-3-3): ვანინსი; გაბოვსი, დუბრა, იაგოდინსკისი, მაქსიმენკო; რუგინსი (სავალნიეკსი 78), ფერტოვსი, იასიევსი; ლუკიანოვსი (რაკელსი 81), გუტკოვსკისი (საბალა 73), კარასაუსკსი

მწვრთნელი: მიქსუს პაატელაინენი

გოლი: 1:0 ოქრიაშვილი (77, პენ)

გაფრთხილება: ვანინსი (48), ისაიევსი (63), კარასაუსკსი (68)

სტატისტიკა – კარისკენ დარტყმები: 10 (5) – 4 (2) ბურთის ფლობა: 61%-39% კუთხურები: 6:4 თამაშგარე: 2:3

მსაჯი: ანასტასიოს პაპაპეტრუ (საბერძნეთი)

0.121414