რიოს XXXI ოლიმპიური თამაშები ამერიკელთა ტრიუმფით დასრულდა. ოლიმპიადის დასკვნითი მედლები ვაჟთა საკალათბურთო ტურნირში გათამაშდა, რომლის გამარჯვებულის ვინაობაც ჯერ კიდევ შეჯიბრის დაწყებამდე იყო ცნობილი. ამერიკელებმა სერბეთი 96:66 (19:15, 33:14, 27:14, 17:23) გაანადგურეს და ქვეყანას რიოში 46-ე (!) ოქროს მედალი მოუტანეს.

მატჩის საუკეთესო კალათბურთელი კევინ დიურანტი გახდა, რომემაც თამაშიდან 19-დან 10 ტყორცნა გამოიყენა და 30 ქულა ჩააგდო. დიდებული იყო დემარკუს კაზინსიც, რომელმაც 13 ქულას 15 მოხსნა წაამატა, კლეი ტომპსონმა 12 ქულა ჩააგდო, პოლ ჯორჯმა – 9, კარმელო ენტონიმ კი 7 ქულას ამდენივე მოხნა წაამატა.

საერთო ჯამში, აშშ-ს დელეგაციამ 46 ოქრო, 37 ვერცხლი და 38 ბრინჯაო (სულ 121) მედალი მოიპოვა და უახლოეს კონკურენტებს საგრძნობლად გაუსწრო. საერთო ჩათვლაში მე-2 დიდი ბრიტანეთი იყო – 27 ოქრო, 23 ვერცხლი, 17 ბრინჯაო (სულ 67), მე-3 კი – ჩინეთი – 26 ოქრო, 18 ვერცხლი, 26 ბრინჯაო (სულ – 70).

შეგახსენებთ, რომ ქართველმა სპორტსმენებმა რიოში 7 მედალი (2 ოქრო, 1 ვერცხლი, 4 ბრინჯაო) დაისაკუთრეს და იმ 88 ქვეყანას შორის, რომელთაც თუნდაც 1 მედალი მოიპოვეს, საკმაოდ მაღალი – 38-ე პოზიცია ერგოთ.

საგულისხმოა, რომ ქართველებმა უკან მოიტოვეს აზერბაიჯანი, ბელარუსი, თურქეთი, სომხეთი, ჩეხეთი, სლოვენია, რუმინეთი, ლიტვა, ბულგარეთი, მონღოლეთი, ნორვეგია, ეგვიპტე, ისრაელი, მოლდოვა, პორტუგალია, ავსტრია, ფინეთი და სხვები.