გუშინ, ფეხბურთის ისტორიაში ერთ-ერთ გამორჩეულ მეკარე ჯანლუიჯი ბუფონს 38 წელი შეუსრულდა. მიუხედავად ასაკისა, ჯიჯი ისევ ჩვეულ დონეზე დგას კარის ხაზზე და ტურინის “იუვენტუსისა” და იტალიის ნაკრების კარს საიმედოდ იცავს.

ბუფონს თავის ხანგრძლივ და მდიდარ კარიერაში არაერთი პირადი და გუნდური ჯილდო მოუგია, ბევრი აღიარებაც მიუღია და უამრავი რეკორდიც დაუმყარებია. რეკორდებიდან გთავაზობთ ხუთ საინტერესოს, რომლის გამეორებაც უახლოეს პერიოდში თითქმის წარმოუდგენელია...

2015 წელი – დაამხო ალესანდრო დელ პიეროს რეკორდი ტურინის “იუვენტუსში” ნათამაშები წუთების მიხედვით და ახლა “ბებერი ქალბატონის” ისტორიაში ამ მხრივ პირველია.

2014 წელი – გახდა პირველი იტალიელი ფეხბურთელი, რომელიც მსოფლიოს ჩემპიონატის ფინალურ ეტაპზე ხუთჯერ იმყოფებოდა (1998 წელი – 0 თამაში, 2002 წელი – 4 თამაში, 2006 წელი – 7 თამაში, 2010 წელი – 1 თამაში, 2014 წელი – 3 თამაში).

2001 წელი – გახდა მსოფლიო ფეხბურთის ისტორიაში ყველაზე ძვირადღირებული მეკარე. 15 წლის წინ “იუვენტუსმა” ჯერ კიდევ 23 წლის კიპერის სანაცვლოდ “პარმას” 41 მილიონი ევრო გადაუხადა. აღნიშნული მაჩვენებელი დღემდე მიუღწეველია.

2013 წელი – იტალიის ეროვნული ნაკრების ისტორიაში ყველაზე მეტი მატჩი ითამაშა. ამ წელს მან ფაბიო კანავაროს რეკორდი დაამხო (136 თამაში). დღეისთვის ჯიჯის “სკუადრა აძურას” მაისური 153-ჯერ მოურგია.

2012 წელი – ფეხბურთის ისტორიისა და სტატისტიკის საერთაშორისო ფედერაციის (IFFHშ) მიერ XXI საუკუნის მეკარედ დასახელდა (1987-2011 წლების).