უკრაინის ჩემპიონატის მეხუთე ტურის მატჩში ლუცკის “ვოლინმა” სტუმრად “სტალი” 2:1 დაამარცხა. გამარჯვების გოლი 80-ე წუთზე საქართველოს ეროვნული ნაკრების ნახევარმცველმა სანდრო კობახიძემ გაიტანა (VIDEO).

ქართველმა ფეხბურთელმა მიმდინარე სეზონში მეორე გოლი მიითვალა. “ვოლინმა” ამ გამარჯვებით სატურნირო ცხრილში მეექვსე ადგილზე გადაინაცვლა.

ოდესის “ჩერნომორეცმა” შინ “ზორია” მიიღო და 0:2 დამარცხდა. მასპინძელთა რიგებში დავით ხოჭოლავამ 90 წუთი ითამაშა, ხოლო ჯაბა ლიპარტიამ ლუგანსკელთა შემადგენლობაში ბოლო 15 წუთი დაჰყო მოედანზე.

რუსეთის პრემიერლიგის მეხუთე ტურში “ლოკომოტივი” შინ “ტერეკს” დაუზავდა. გროზნოელთა განაცხადში თედორე გრიგალაშვილი კი გახლდათ, მაგრამ მატჩში მონაწილეობა არ მიუღია.

ჩეხეთის ჩემპიონატის მეოთხე ტურში “სლავიამ” “იჰლავა” შინ 4:0 დაამარცხა. მასპინძელთა განაცხადში კვლავ არ გახლდათ ლევან ყენია. საქართველოს ეროვნული ნაკრების შემტევი ტრავმას იშუშებს და მისი არყოფნის მიზეზიც ეს გახლდათ.