პოლონეთის საფეხბურთო ექსტრაკლასას 36-ე ტურში, ბიალისტოკის “იაგიელონიამ” სტუმრად შჩეცინის “პოგონი” 3:1 დაამარცხა.

შემტევმა ნახევარმცველმა ნიკა ძალამიძემ გამარჯვებულებში სრულად ითამაშა და საგოლე პასი მიითვალა. მარცხენა მცველი გიორგი ფოფხაძე სათადარიგოთა სკამზე ჯდომით შემოიფარგლა. ექსტრაკლასას დასრულებამდე ერთი ტურით ადრე მე-3 პოზიციაზე მყოფ “იაგიელონიას” 38 ქულა აქვს და მეორეადგილოსან ვარშავის “ლეგიას” ერთი ქულით ჩამორჩება. გათამაშებას 42 ქულით პოზნანის “ლეხი” ლიდერობს.

ნორვეგიის ასოციაციის თასზე “სტაბეკმა” სტუმრად “სენიას” 3:1 აჯობა. გამარჯვებულებში ქართველმა ნახევარმცველმა გიორგი გოროზიამ 90 წუთი ითამაშა და ყვითელი ბარათი მიიღო. “სტაბეკი” მომდევნო ეტაპზე ითამაშებს.

ფინეთის ვეიკაუსლიგის მე-11 ტურში, “კოოტეპემ” გასვლაზე “როვანიემისთან” 0:4 წააგო. მარჯვენა მცველმა გიორგი ოსიტაშვილმა დამარცხებულებში თავიდან ბოლომდე იასპარეზა. 10-გუნდიან ვეიკაუსლიგაში “კოოტეპე” 10 ქულით მეცხრეა.

პირველი დივიზიონის ტიხვინის “ტოსნომ” რუსეთის პრემიერლიგაში გადასასვლელი პირველი მატჩი შინ “როსტოვთან” 0:1 წააგო. მეკარე ნუკრი რევიშვილი და მარცხენა მცველი გიორგი ნავალოვსკი მასპინძელთა 18-კაციან განაცხადში არ იყვნენ. ისინი ეროვნული ნაკრების შემადგენლობაში ავსტრიაში შეკრებას გადიან. რუსეთის მოქალაქე მცველმა გურამ თეთრაშვილმა შეხვედრა სრულად ჩაატარა.

პირველი დივიზიონის წარმომადგენელი ტომსკის “ტომი”, რომელსაც პრემიერლიგაში გადასვლა სურს, შინ “ურალთან” 0:1 დამარცხდა. რუსეთის მოქალაქე ფორვარდმა ანზორ სანაიამ ტომსკელებში 90 წუთი იასპარეზა.