დანია

დანიის პირველი დივიზიონის მე-20 ტურში ქულის მომტანი გოლი გაიტანა მათე ვაწაძემ. “ორჰუსმა” საკუთარ მოედანზე “სკივის” უმასპინძლა. პირველი ტაიმი სტუმართა გამარჯვებით 2:0 დასრულდა, მე-60 წუთზე აბეკმა სხვაობა შეამცირა, 74-ე წუთზე კი მათე ვაწაძემ მატჩის საბოლოო ანგარიში დააფიქსირა. “ორჰუსის” სასტარტო შემადგენლობაში ქართველ ფეხბურთელებს არ უთამაშიათ. შესვენების შემდეგ თამაშში მათე ვაწაძე ჩაერთო, 87-ე წუთზე კი მინდორზე დავით სხირტლაძე გამოჩნდა.

კვიპროსი

კვიპროსის ჩემპიონატის 25-ე ტურში “ანორთოსისმა” საკუთარ მოედანზე “ომონიას” უმასპინძლა. სტუმრებმა ფამაგუსტელები 3:1 დაამარცხეს. მასპინძელთა სასტარტო შემადგენლობაში მოთამაშე გიორგი აბურჯანია 79-ე წუთზე ირაკლი მაისურაძემ შეცვალა, “ომონიას” შემადგენლობაში კი სრულად ითამაშა უჩა ლობჟანიძემ.

მე-5 წუთზე ესმაელ გონშალვესმა მასპინძლები დააწინაურა, პირველი ტაიმის მიწურულს რობერტომ თერთმეტმეტრიანით აღადგინა წონასწორობა, 58-ე წუთზე ნუნო ასისმა სტუმრები დააწინაურა, 76-ე წუთზე კი რობერტომ დუბლი შეასრულა და მატჩის საბოლოო ანგარიში დააფიქსირა.

პოლონეთი

პოლონეთის 25-ე ტურში “პოდბესკიძიემ” მინიმალური სხვაობით დაამარცხა “იაგელონია.” სტუმართა სასტარტო შემადგენლობაში მოხვდნენ გიორგი ფოფხაძე და ნიკა ძალამიძე. ფოფხაძემ სრულად ითამაშა და 42-ე წუთზე ყვითელი ბარათი მიიღო, ძალამიძემ კი 83-ე წუთზე დატოვა მოედანი. “იაგელონიას” კარში ერთადერთი გოლი მატჩის მიწურულს, მსაჯის მიერ დამატებულ მესამე წუთზე გავიდა. გოლის ავტორი სლოვაკი რობერტ დემიანია.

ბოდგოშის “ზავიშამ” გასვლით შეხვედრაში 2:1 დაამარცხა ჩორზოვის “რუხი.” ქართველი ფეხბურთელი გიორგი ალავერდაშვილი სათადარიგოთა შორის იყო და თამაშში 74-ე წუთზე ჩაერთო. პოლონეთის ექსტრაკლასის სატურნირო ცხრილში “ზავიშა” კვლავ ბოლო ადგილზე იმყოფება.

პორტუგალია

პორტუგალიის პრიმეირალიგის 26-ე ტურში “აროუკამ” საკუთარ მოედანზე 3:1 დაამარცხა “ჟილ ვისენტე.” სათადარიგოთა შორის მყოფი ავთანდილ ებრალიძე თამაშში 52-ე წუთზე ჩაერთო. გასავარდნ ზონაში მყოფი “ჟილ ვისენტე” სატურნირო ცხრილის მე-17 ადგილს იკავებს, ქართველი ფეხბურთელის გუნდს მხოლოდ “პენაფიელი” ჩამორჩება.

პორტუგალიის სეგუნდა ლიგის 36-ე ტურში “ფეირენსემ” საკუთარ მოედანზე 3:0 დაამარცხა “აკადემიკა.” ქართველმა მეკარე გიორგი მაკარიძემ სრულად იათამაშა.

ლიტვა

ლიტვის ა ლიგის მე-5 ტურში “კრუოხასა” და “შიაულიაის” მატჩი ფრედ 2:2 დასრულდა. “შიაულიას” სასტარტო შემადგენლობაში მოხვდა თამაზ ჩარგეიშვილი, რომელმაც მოედანი 74-ე წუთზე დატოვა.