ფეხბურთი

13:45 | 16.02.2015 | ნანახია [] - ჯერ

ყენია “სლავიას” დაუბრუნდა (+VIDEO)

ლევან ყენიამ თითის ტრავმა მოირჩინა და პრაღის “სლავიას” რიგებში ითამაშა. პრაღელებმა ამხანაგურ შეხვედრაში “ჟიჟკოვი” 3:0 დაამარცხეს და ქართველმა შემტევმა ნახევარმცველმა პირველი ტაიმი ჩაატარა. მან ტრავმის გამო წინა ორი სპარინგი გამოტოვა.

რუსეთის საფეხბურთო ნაციონალური ლიგის (პირველი დივიზიონი) პირველ ტურში ხაბაროვსკის “სკა-ენერგიამ” ასტრახანის “ვოლგართან” 2:4 წააგო. მარჯვენა მცველი კახა ალადაშვილი ხაბაროვსკელების სასტარტოში იყო და 37-ე წუთზე ანგარიშში სხვაობა ერთი ბურთით შემაცირა – 1:2. მან მე-10 წუთზე ყვითელი ბარათი მიიღო, ხოლო 77-ეზე შეცვალეს. რუსეთის მოქალაქე ნახევარმცველმა გუჯა რუხაიამ “სკა-ენერგიაში” ორი ტაიმი ჩაატარა, ხოლო ცოტა ხნის წინ გამოჯანმრთელებული გოგიტა გოგუა 18-კაციან განაცხადში არ იყო.

“კუოპიონ პოლოსეურამ”, რომელსაც მიმდინარე ზამთარში ირაკლი სირბილაძე შეემატა, სახლში “ლაჰტისთან” 1:2 წააგო. ქართველი თავდამსხმელი 18-კაციან განაცხადში იყო, მაგრამ არ უთამაშია.

თამაზ პერტიას გაწვრთნილმა რიგის “სკონტომ” ამხანაგურ შეხვედრა ტალინის “ფლორასთან” 3:4 წააგო. ტალინელთა შორის ზაქარია ბეგლარიშვილმა პირველი ტაიმი ჩაატარა, ხოლო ირაკლი ლოგუამ, რომელიც რუსეთის მოქალაქეა, სრულად ითამაშა. აღსანიშნავია, რომ “სკონტო” პირველ ტაიმში 3:0 იგებდა, მაგრამ საბოლოოდ დამარცხდა.

“ოდენსემ”, რომლის ღირსებას ლადო დვალიშვილი იცავს, თურქულ შეკრებაზე ბოსნიურ “შიროკი ბრეგთან” საკონტროლო შეხვედრაში 1:1 ითამაშა. ქართველი თავდამსხმელი სასტარტო შემადგენლობაში იმყოფებოდა.

0.101819