ფეხბურთი

19:32 | 5.09.2019 | ნანახია [] - ჯერ

საქართველო სამხრეთ კორეას დაუზავდა

საქართველოს ეროვნული ნაკრების და სამხრეთ კორეის ამხანაგური მატჩი ფრედ 2:2 დასრულდა. სტამბოლში "ბაშაკშეჰირის" სტადიონზე გამართულ შეხვედრაში ანგარიში ვაკო ყაზაიშვილის გადაცემის შემდეგ ჯანო ანანიძემ მე-40 წუთზე გახსნა, ხოლო კორეელებმა მეორე ტაიმის დასაწყისშივე ანგარიში გაათანაბრეს - სონის გადაცემის შემდეგ ჰვანმა გამოიჩინა თავი. ამავე ჰვანმა 85-ე წუთზე სამხრთ კორეა დააწინაურა, ხოლო გიორგი ქვილითაიამ 90-ე წუთზე ჯაბა კანკავას გადაცემის შემდეგ საქართველოს ნაკრები წაგებისგან იხსნა.

მთელი შეხვედრის განმავლობაში თანაბარი თამაში მიმდინარეობდა და კორეელებს ბურთის ფლობაში მცირე უპირატესობა ჰქონდათ. საქართველო პრესინგს კარგად თამაშობდა და "ჯვაროსნები" მეტოქეს ბურთს ხშირად ართმევდნენ, თუმცა აშკარა საგოლე მომენტებს ვერ იყენებდნენ და სწრაფად შეტევებში ვერ გადადიოდნენ. რამდენიმე მომენტი ჰქონდა ვაკო ყაზაიშვილს და შეეძლო გოლის გატანა, თუმცა არ გაუმართლა.

საქართველოს ეროვნული ნაკრები სტამბოლიდან თბილისში დაბრუნდება და დანიასთან გასამართი შეხვედრისთვის დაიწყებს მომზადებას. 2020 წლის ევროპის ჩემპიონატის შესარჩევი ეტაპის მატჩი "ჯვაროსნებსა" და სკანდინავიელებს შორის 8 სექტემბერს "დინამო არენაზე" 20:00 საათზე დაიწყება.

0.139364