კალათბურთი

2:03 | 30.08.2019 | ნანახია [] - ჯერ

ზაზა ფაჩულია "გოლდენ სტეიტში" დაბრუნდა, მაგრამ კარიერა დაასრულა

ლეგენდარულმა ქართველმა კალათბურთელმა ზაზა ფაჩულიამ კარიერა დაასრულა. აღნიშნული ცნობა ზაზას ყოფილი გუნდის „გოლდენ სტეიტ უორიორზის“ ვებგვერდმა გაავრცელა.

გარდა ამისა, „მეომრების“ საიტი წერს, რომ ფაჩულია კლუბში დაბრუნდა და კონსულტანტის პოზიციაზე დაინიშნა.

35 წლის ქართველი კალათბურთელის კარიერაში ბოლო გუნდი „დეტროიტ პისტონსი“ გამოდგა, რომლის რიგებში გასული სეზონი გაატარა. საერთოდ კი, ზაზა NBA-ში 2003 წელს „ორლანდო მეჯიქის“ რიგებში დრაფტის 42-ე ნომრად აღმოჩნდა და უმთავრეს საკალათბურთო ლიგაში 16 წელი მიჯრით გაატარა. მთლიანობაში ზაზამ NBA-ში 1098 მატჩი ჩაატარა და საშუალოდ თამაშში 20.8 წუთში 6.8 ქულას, 5.8 მოხსნასა და 1.3 პასს აგროვებდა.

ფაჩულიამ ხსენებული „დეტროიტისა“ და „ორლანდოს“ გარდა, „მილუოკი ბაქსის“, „ატლანტა ჰოუქსის“, „დალას მავერიქსისა“ და „გოლდენ სტეიტის“ რიგებში ითამაშა. სწორედ „უორიორზთან“ ერთად ორჯერ მოიგო საჩემპიონო ბეჭედი და პირველი ქართველი კალათბურთელი გახდა, რომელმაც აღნიშნულ შედეგს უწია.

ევროპულ კარიერაში კი, ზაზა თურქეთში ირჯებოდა. კარიერის საწყის ეტაპზე „ულქერსპორის“ ღირსებას იცავდა, ხოლო NBA-ში ბოიკოტის დროს (2011 წელს) „გალათასარაიში“ ასპარეზობდა.

საქართველოს ეროვნულ ნაკრებში ფაჩულია 2003-2017 წლებში თამაშობდა და სამჯერ (2011, 2015, 2017 წლებში) ევრობასკეტზეც ითამაშა.

0.12263