აზერბაიჯანის დედაქალაქ ბაქოში მიმდინარე ევროპის რიგით XV ახალგაზრდულ ოლიმპიურ ფესტივალზე, დღეს, ქართველმა მოჭიდავეებმა კიდევ 4 მედალი – 2 ვერცხლი და 2 ბრინჯაო მოიპოვეს.

თავისუფალი სტილით მოჭიდავე ლუკა გუგეშაშვილმა (48 კგ.) გზიდან პოლონელი ინდიცკი და ბელარუსი რუდაუსკი დაამარცხა, ფინალში კი რუს ბეკბულატოვთან დამარცხდა.
ვერცხლი მოიპოვა ხვიჩა აბულაძემაც (48 კგ.), რომელიც საქართველოს ბერძნულ-რომაული სტილით მოჭიდავეთა ნაკრების წევრი გახლავთ. აბულაძემ მოლდოველ ვიტანსა და გერმანელ ინგლიშს აჯობა, გადამწყვეტი შერკინება კი აზერბაიჯანელ გურბანოვთან დათმო.
ბრინჯაოს მედალს დაეუფლა “ბერძენ-რომაელი” ნიკა ბროლაძე (60 კგ.). ქართველმა ფალავანმა სლოვაკი შეილერი, მოლდოველი გურალი და რუმინელი ბოტეზი დაჯაბნა, ნახევარფინალში რუს გიგიევთან დამარცხდა, რეპეშაჟში კი თურქ იურტადას მოუგო.
მე-3 ადგილზე გავიდა დავით აბდალაძეც (60 კგ.), რომელიც თავისუფალი სტილით მოჭიდავეთა ტურნირში ირჯებოდა. აბდალაძემ თურქ დოგანსა და რუმინელ მატეას მოუგო, ნახევარფინალში რუს ბალტუევს ვერ გაუმკლავდა, ბრინჯაოს მედლისთვის ბრძოლაში კი პოლონელ სობოლევსკის მოუგო.
ამ დროისთვის, ქართული დელეგაციის აქტივში 4 ვერცხლისა და 2 ბრინჯაოს მედალია, რაც გუნდურ შეჯიბრში მე-9 შედეგის ტოლფასია, მედლების რაოდენობით კი, ქართველები მხოლოდ აზერბაიჯანსა (10) და რუსეთს (8) ჩამორჩებიან.