საქართველოს მორაგბეთა ჩემპიონატის პირველ ლიგაში ოთხი ტურის შემდეგ ის სამი გუნდი გამოიკვეთა, რომლებიც უმაღლესი ლიგის საგზურისთვის იბრძოლებენ.

პირველ ლიგაში გუნდების რვამდე შემცირების შემდეგ ეს გათამაშებაც საინტერესო გახდა. ამ ეტაპზე სამი ისეთი გუნდია, რომლებსაც მარცხი არ განუცდიათ და დიდი ალბათობით, ძლიერის ბედი თბილისის “დინამოსა” და “აკადემიის”, ასევე ქუთაისის “ბაგრატის” ურთიერთშეხვედრებში გაირკვევა. შეგახსენებთ, რომ პირველადგილოსანი ავტომატურად იღებს უმაღლესი ლიგის საგზურს და მეათეადგილოსნის ადგილს დაიკავებს, ხოლო პირველი ლიგის მეორეადგილოსანი უმაღლესის მეცხრეადგილოსანთან ორმატჩიან დუელს გამართავს.

“დინამომ” ოთხი თამაში ჩაატარა და სამში პრემიალური ქულით იმარჯვა. დინამოელებმა პირველ ტურში წყალტუბოს “დინოზავრებს” სამი უპასუხო ლელო გაუტანეს და 19:0 იმარჯვეს, მეორე ტურში პატარძეულში “ვეფხვებს” ეწვივნენ და 24:15 იმარჯვეს, მაგრამ პრემიალური ქულის აღება ვერ შეძლეს, ხოლო 21 და 28 სექტემბერს შესაბამისად ფოთის “კოლხი რაინდები”  (36:7) და სტუ (35:7) პრემიალური ქულებით დაამარცხეს. ამრიგად, “დინამოს” 19 ქულა აქვს და პირველ ადგილზეა.

“აკადემიას” და “ბაგრატს” მეოთხე ტურის თამაშები ჯერ არ ჩაუტარებიათ. უმაღლესი ლიგიდან წინა სეზონის შედეგების მიხედვით დაქვეითებულმა აკადემიელებმა პირველ ტურში სტუ 73:3 გაანადგურეს, მერე “ხულიგანას” 57:3 აჯობეს, ხოლო წყალტუბოს “დინოზავრებს” 69:5 მოუგეს. “აკადემიამ” სამ თამაშში მხოლოდ ერთი ლელო გაუშვა, სამივეჯერ აიღო პრემიალური ქულა და მეორე ადგილზეა. მეოთხე ტურის შეხვედრას გუნდი 4 ოქტომბერს, პატარძეულში “ვეფხვებთან” გამართავს.

ერთი ლელო აქვს გაშვებული “ბაგრატსაც”, რომელმაც “ხულიგანა” მშრალზე დატოვა (34:0), მერე წყალტუბოში “დინოზავრებს” სამი ლელო გაუტანა, თავისი ჩათვლის მოედანი ხელუხლებელი შეინახა და 19:6 მოგებით პრემიალური ქულაც მიითვალა, ხოლო მესამე ტურში პატარძეულის “ვეფხვებს” 18:7 მოუგო, თუმცა პრემიის აღება ვერ მოახერხა და 14 ქულით მესამეა. “ბაგრატი” მეოთხე ტურის თამაშს 5 ოქტომბერს ფოთში, “კოლხი რაინდების” წინააღმდეგ გამართავს.